নিয়মীয়া বাৰ্তা, কাজলগাঁও,৩ মাৰ্চ: ইণ্ডিয়ান অইল কৰ্পোৰেচন লিমিটেডৰ অধিনস্থ বঙাইগাঁও শোধনাগাৰৰ মুৰব্বী হিচাপে নয়ন কুমাৰ বৰুৱাই দায়িত্বভাৰ গ্ৰহণ কৰে। বঙাইগাঁও শোধনাগাৰ কৰ্তৃপক্ষই আজি এক প্ৰেছ বিজ্ঞপ্তিৰ জৰিয়তে এই বিষয়ে জানিবলৈ দিয়ে। মুখ্য মহাপ্ৰৱন্ধক নয়ন কুমাৰ বৰুৱাই যোৱা ১ মাৰ্চত সদ্য অৱসৰী কাৰ্যবাহী সঞ্চালক এছ পি বৰুৱাৰ পৰা শোধনাগাৰটৰো মুৰব্বী হিচাপে দায়িত্বভাৰ গ্ৰহণ কৰা বুলি বিজ্ঞপ্তিটোত প্ৰকাশ কৰে। গুৱাহাটীস্থিত অসম অভিযান্ত্ৰিক মহাবিদ্যালয়ৰ পৰা কেমিকেল ইঞ্জিনিয়াৰিঙত স্নাতক বৰুৱাই ১৯৯৩ চনত ইণ্ডিয়ান অইল কৰ্পোৰেচন লিমিটেডত যোগদান কৰিছিল। তেল শোধন খণ্ডত ২৬ বছৰৰো অধিক কাল অভিজ্ঞতাৰ সৈতে বৰুৱাই ৰাজ্যৰ শোধনাগাৰ তথা দেশৰ অন্যান্য শোধনাগাৰত কাম কৰাৰ পৰা প্ৰাপ্ত এক সমৃদ্ধ আৰু বৈচিত্ৰ্যপূৰ্ণ অভিজ্ঞতা কঢ়িয়াই আনিছে। য’ত উৎপাদন, কাৰিকৰী সেৱা, প্ৰকল্প, স্বাস্থ্য সুৰক্ষা আৰু পৰিৱেশ আদি বিভিন্ন ক্ষেত্ৰ অন্তৰ্ভুক্ত হৈ আছে।