নিয়মীয়া বাৰ্তা, ৯ মাৰ্চঃ বহু জল্পনা -কল্পনাৰ অন্তত আজি ঘোষণা কৰা ৰহা পৌৰসভাৰ নিৰ্বাচনী ফলাফলত বিজেপি-অগপৰ মিত্ৰজোঁটে দখল কৰিবলৈ সক্ষম হৈছে। উল্লেখ্য যে, দহখন আসনেৰে গঠিত ৰহা পৌৰসভাৰ ১নং ৱাৰ্ডৰ বিজেপিৰ প্ৰাৰ্থী প্ৰীতি বৰদলৈয়ে বিনা প্ৰতিদন্দিতাৰে জয় লাভ কৰে।আজি ঘোষণা কৰা ফলাফল অনুসৰি ২নং ৱাৰ্ডৰ বিজেপিৰ প্ৰাৰ্থী বন্তি হাজৰিকা, ৩নং ৱাৰ্ডৰ বিজেপিৰ অজন্তা বৰদলৈ , ৪নং ৱাৰ্ডৰ উমানন্দ চাংমাজী, ৫নং ৱাৰ্ডৰ বিজেপি প্ৰাৰ্থী লক্ষণ ডেকাৰজা, ৬নং ৱাৰ্ডৰ অসম গণ পৰিষদৰ প্ৰাৰ্থী ভূপেন দাস, ৭নং ৱাৰ্ডৰ নিৰ্দলীয় প্ৰাৰ্থী মৌচুমী মুদৈ, ৮নং ৱাৰ্ডৰ বিজেপি প্ৰাৰ্থী অনিমা দাস , ৯নং ৱাৰ্ডৰ অসম জাতীয় পৰিষদৰ জোনমনি বৰদলৈ আৰু 10নং ৱাৰ্ডৰ নিৰ্দলীয় প্ৰাৰ্থী সঞ্জীৱ হাজৰিকাই জয়লাভ কৰে। ফলাফল অনুসৰি বিজেপি দলে ৬ টা, অসম গণ পৰিষদ দলে ১টা আৰু নিৰ্দলীয় হিচাপে ২টা ৱাৰ্ডত জয় লাভ কৰা বিপৰীতে ১ খন আসন লাভ কৰি সন্মান ৰক্ষা কৰে অসম জাতীয় পৰিষদে। আজি দিনৰ ভাগতে এই ফলাফল লাভ কৰা পাছতে সমগ্ৰ ৰহা পৌৰসভাৰ প্ৰতিটো ৱাৰ্ডতে বিজয় প্ৰাৰ্থী সকলৰ লগতে সমৰ্থক সকলৰ ব্যাপক উচাহ দেখা গৈছৈ। অন্যহাতে মন কৰিবলগীয়া যে, এছ চি, মহিলাৰ বাবে সংৰক্ষিত ৰহা পৌৰসভাৰ পৌৰপতিৰ আসন খন কোনে দখল কৰিব তাকেলৈ আৰম্ভ হৈছে চিন্তা-চৰ্চা। জানিব পৰামতে চেয়াৰমেন পদৰ বাবে একাংশ দলীয় কৰ্মীয়ে দুই নং ৱাৰ্ডৰ প্ৰাৰ্থী বন্তি হাজৰিকাক প্ৰক্ষেপ কৰিছে। বন্তি হাজৰিকাই বিগত কাৰ্যকালতো উক্ত ৱাৰ্ডৰ পৰা নিৰ্বাচিত হৈছিল।ইয়াৰ বিপৰীতে আন একাংশই আকৌ আঠ নং ৱাৰ্ডৰ অনিমা দাসক চেয়াৰমেন পদত বহুৱাবলৈ বিচাৰিছে। প্ৰাক্তন বিধায়ক ডিম্বেশ্বৰ দাসৰ পত্নী তথা ৰহা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষয়িত্ৰী অনিমা দাস চেয়াৰমেন পদৰ বাবে যোগ্য বুলি দাবী কৰিছে।
প্ৰেৰক ভৱজ্যোতি ডেকা