নিয়মীয়া বাৰ্তা, ১০ মাৰ্চঃ নগাঁও আৰক্ষীয়ে ড্ৰাগছৰ বিৰুদ্ধে অভিযান অব্যাহত ৰাখিছে ৷ এই অভিযানৰ অংশ হিচাপে নগাঁও আৰক্ষীয়ে বিভিন্ন স্থানত অভিযান চলাই চাৰিজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয় । যোৱানিশা এক গোপন সুত্ৰৰ পম খেদি কামপুৰ আৰক্ষী থানাৰ অন্তৰ্গত ৰেংবেঙৰ পৰা আৰক্ষীয়ে দুজন ড্ৰাগছ সৰবৰাহকাৰীক গ্ৰেপ্তাৰ কৰাৰ লগতে বুজন পৰিমানৰ নিচাযুক্ত ঔষধ জব্দ কৰিবলৈ সক্ষম হয়৷ আৰক্ষীয়ে গ্ৰেপ্তাৰ কৰা লোক দুজন হল হোজাই জিলাৰ যমুনামুখ আৰক্ষী থানাৰ অন্তৰ্গত জংঘল ব্লকৰ বচিৰ উদ্দিন (২২) আৰু উত্তৰ ত্ৰিপুৰা জিলাৰ কদমতলাৰ আৰক্ষী থানাৰ অন্তৰ্গত চৰাইবাৰীৰ ম: ফাৰুক ইছলাম (২৮) । আৰক্ষীয়ে তেওঁলোকৰ জিম্মাৰ পৰা ২০২ গ্ৰাম মৰফিন , এখন পালছাৰ বাইক ,দুটা মোৱাইল ফোন আৰু নগদ ধন জব্দ কৰিবলৈ সক্ষম হয় ৷
ইপিনে নগাঁৱৰ হয়বৰগাঁও আৰক্ষী চকীৰ আৰক্ষীয়ে জুৰীয়া আৰক্ষীৰ সহযোগত গৰীয়া কাৱৈমাৰীৰ পৰা এজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয় ৷ আৰক্ষীয়ে আজি বিয়লি অভিযান চলাই এই সফলতা লাভ কৰে । আৰক্ষীয়ে গ্ৰেপ্তাৰ কৰা ড্ৰাগছ সৰবৰাহকাৰী জন হল মুছাব্বিৰ হুছেইন (২৭) । আৰক্ষীয়ে তেওঁৰ জিম্মাৰ পৰা প্ৰায় ৮ গ্ৰাম হিৰইন আৰু ৫০০ টা খালী কন্টেনাৰ জব্দ কৰে ৷ আনহাতে নগাঁও আৰক্ষীৰ মহিলা কোষৰ ভাৰপ্ৰাপ্ত বিষয়া জোনমনি ৰাভাৰ নেতৃত্বত যোৱা আৰক্ষীৰ দলে চামগুৰি বজাৰত অভিযান চলাই এজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয় ৷ আৰক্ষীয়ে এই সন্দৰ্ভত চামগুৰি বজাৰৰ পৰা নাৰায়ণ কুমাৰ ৰয় নামৰ এজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয় ৷আৰক্ষীয়ে তেওঁৰ পৰা ৭ টা হিৰইন ভৰ্ত্তি কন্টেনাৰ জব্দ কৰিবলৈ সক্ষম হয় ৷