নিয়মীয়া বাৰ্তা, ১৬ মাৰ্চঃ এই বছৰৰ আই পি এল (IPL 2022) নিলামৰ আটাইতকৈ ডাঙৰ খবৰটো আছিল সুৰেশ ৰাইনাক কোনো দলেই ক্ৰয় নকৰা। ১০ টা ফ্ৰেঞ্চাইজিৰ কোনোটোৱেই অভিজ্ঞ ৰাইনাক দলত ৰাখিবলৈ কোনো উৎসাহ প্ৰদৰ্শন কৰা নাছিল। যিয়ে ক্ৰিকেট অনুৰাগীসকলক হতাশ কৰিছিল। কিন্তু শেষ মুহূৰ্তত ভাগ্যৰ চকা ঘূৰিব পাৰে Mr IPLৰ। কিয়নো খবৰ অনুসৰি ৰাইনাক আই পি এলত দেখা যাব পাৰে। কিন্তু ক্ৰিকেটাৰ হিচাপে নহয়, অন্য এক বেলেগ ৰূপতহে। মিডিয়াৰ এক সূত্ৰ অনুসৰি, ৰাইনাই ভাষ্যকাৰ হিচাপে আই পি এলত ভুমুকি মাৰিব পাৰে।
ৰাইনাৰ আই পি এললৈ উভতি অহাটো প্ৰায় নিশ্চিত। সৰ্বভাৰতীয় সংবাদ মাধ্যমৰ এক সূত্ৰ অনুসৰি, ৰাইনাক আই পি এলত ভাষ্যকাৰ হিচাপে দেখা যাব। খেলৰ সম্প্ৰচাৰক ষ্টাৰ স্পৰ্টছৰ দ্বাৰা হিন্দী কমেণ্ট্ৰী পেনেলত ৰাইনাৰ নাম উল্লেখ কৰা হৈছে। দৰাচলতে, ষ্টাৰ স্পৰ্টছে ৰাইনাৰ বৃহৎ অনুৰাগীসকলক আকৰ্ষণ কৰাৰ স্বাৰ্থতে তেওঁক কমেণ্ট্ৰী পেনেলত ৰাখিছে।