নিয়মীয়া বাৰ্তা, ২৩ জানুৱাৰীঃ দ্বিতীয় বাছনিপ্রাপ্ত ছার্বিয়াৰ ন’ভাক জক’ভিচ, তৃতীয় বাছনিৰ ছুইজাৰলেণ্ডৰ ৰ’জাৰ ফেডেৰাৰ আৰু ষষ্ঠ বাছনিৰ ষ্টেফান’ছ টিটচিপাছে চলিত অষ্ট্রেলিয়ান অ’পেনৰ তৃতীয় ৰাউণ্ডত স্থান সুৰক্ষিত কৰিছে৷
অৱশ্যে গ্রেণ্ডশ্লামখনৰ দ্বিতীয় ৰাউণ্ডৰ পৰা বিদায় লয় অষ্টম বাছনিৰ মাটে’ বেৰেট্টিনি, অষ্টাদশ বাছনিৰ গ্রিগ’ৰ ডিমিট্র’ভে৷ দ্বিতীয় ৰাউণ্ডৰ মেচত জক’ভিচে টাটছুমা ইট’ক ৬–১, ৬–৪, ৬–২ ছেটত, ফেডেৰাৰে ফিলিপ ক্রাজিন’ভিচক ৬–১, ৬–৪, ৬–১ ছেটত পৰাস্ত কৰে৷
ইফালে, ফিলিপ ক’লস্ক্রেইবাৰে আঘাতৰ বাবে নাম প্রত্যাহাৰ কৰাত টিটচিপাছে অগ্রগতি লাভ কৰে৷ মহিলা শাখাৰ ছিংগলছত প্রাক্তন চেম্পিয়ন ছেৰেনা উইলিয়ামছৰ লগতে শীর্ষ বাছনিৰ এছলে বার্টি, তৃতীয় বাছনিৰ নাওমি অ’ছাকা, দশম বাছনিৰ মেডিছন কীয়ে তৃতীয় ৰাউণ্ডত স্থান সুৰক্ষিত কৰিছে৷
ইফালে, একাদশ বাছনিৰ ছাবালেংকাৰ লগতে ত্রয়োদশ বাছনিৰ পেট্রা মার্টিকে বিদায় লয়৷ আনহাতে, ক’ক’ গ’ফে ছ’ৰানা ক্রিষ্টিক পৰাস্ত কৰি গ্রেণ্ডশ্লামখনত আন এক চমক দেখুৱাবলৈ সক্ষম হৈছে৷