নিয়মীয়া বাৰ্তা, ২৪ মাৰ্চঃ টীম ইণ্ডিয়াৰ তাৰকা অলৰাউণ্ডাৰ ৰবীন্দ্র জাদেজাই আই চি চি টেষ্ট ৰেংকিঙৰ অলৰাউণ্ড শাখাৰ শীর্ষ স্থানটো পুনৰুদ্ধাৰ কৰিছে৷ আই চি চিয়ে প্রকাশ কৰা ৰেংকিঙৰ অলৰাউণ্ডাৰ শাখাত ৩৮৫ ৰেটিং পইণ্টেৰে জাদেজাই শীর্ষ স্থানটো পুনৰ দখল কৰে৷ ভাৰতীয় দলটোৰ তাৰকা ক্রিকেটাৰগৰাকীয়ে ৱেষ্ট ইণ্ডিজৰ জেছন হ’ল্ডাৰক আঁতৰাই শীর্ষ স্থানটো নিজৰ দখললৈ আনে৷
ইফালে, ভাৰতৰ প্রবীণ তাৰকা স্পিনাৰ ৰবিচন্দ্রন অশ্বিনে তৃতীয় স্থানটো অক্ষুণ্ণ ৰাখিছে৷ এটা স্থান আগুৱাই অষ্ট্রেলিয়াৰ পেট কামিনছ অষ্টম স্থানলৈ উন্নীত হৈছে৷ ইফালে, বেটাৰ শাখাত এটা স্থানৰ অৱনমন ঘটিছে টীম ইণ্ডিয়াৰ অধিনায়ক ৰোহিত শর্মাৰ৷ অষ্ট্রেলিয়াৰ লাবুচানেই শীর্ষ স্থান দখল কৰি থকা বেটাৰ শাখাত ৰোহিত শর্মাই সপ্তম স্থানলৈ অৱনমিত হৈছে৷ বিৰাট কোহলি আৰু উইকেটকীপাৰ বেটছমেন ঋষভ পণ্টে ক্রমে নৱম আৰু দশম স্থানটো অক্ষুণ্ণ ৰাখিছে৷
ইপিনে, পাকিস্তান দলটোৰ অধিনায়ক বাবৰ আজমৰ তিনিটাকৈ স্থানৰ উত্থান হৈছে৷ ৭৯৯ ৰেটিং পইণ্টেৰে বাবৰ আজমে পঞ্চম স্থানটো অধিকাৰ কৰিছে৷