বিশেষ বাৰ্তা, ৩০ মাৰ্চঃ মৰিয়নিৰ নকছাৰীৰ দেবেৰাপাৰ আৰক্ষী চকীৰ অন্তৰ্গত নাগিনীজান চাহ বাগিচাত সংঘটিত এক নৃশংস হত্যাকাণ্ডৰ ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে । নাগিনীজান চাহ বাগিচাৰ বিলবস্তি নামৰ ঠাইত যোৱানিশা এই ঘটনা সংঘটিত হয় । ঘটনাৰ সম্পৰ্কত জানিব পৰা মতে, নাগিনীজান চাহ বাগিচাৰ বিলবস্তিৰ লক্ষীৰাম কৰ্মকাৰ নামৰ হত্যাকাৰীটোৱে যোৱা নিশা পত্নী চম্বাৰী কৰ্মকাৰক অকথ্য শাৰীৰিক নিৰ্যাতন চলাই হত্যা কৰে । হত্যাকাৰী লক্ষীৰামে পত্নী চম্বাৰীক ফলা খৰি, বাঁহ আদিৰে শৰীৰৰ বিভিন্ন ঠাইত আঘাত কৰে । বাঁহেৰে মহিলাগৰাকীৰ দেহৰ একাধিক স্থানত খোঁচে । আনকি মহিলাগৰাকীৰ দেহত দাৰে আঘাত কৰা লগতে গুপ্তাংগত বাঁহেৰে আঘাত কৰি নৃশংসভাৱে হত্যা কৰে হত্যাকাৰী স্বামী লক্ষীৰাম কৰ্মকাৰে ।হত্যাকাৰী স্বামীয়ে নিশাই পত্নীক হত্যা কৰি আজি পুৱা মৃতদেহটো পুতিবৰ বাবে যো – জা কৰোতে লক্ষীৰামৰ আচৰণ আৰু মৃতদেহটোৰ শৰীৰত গুৰুতৰ আঘাতৰ চিন প্ৰত্যক্ষ কৰি চুবুৰীয়া লোকে দেবেৰাপাৰ আৰক্ষীক খবৰ দিয়ে । উল্লেখ্য যে হত্যাকাৰী লক্ষীৰামে মদ্যপান কৰি দীৰ্ঘদিন ধৰি পত্নী চম্বাৰী কৰ্মকাৰৰ লগত কাজিয়াত লিপ্ত হৈ নিৰ্মম শাৰীৰিক নিৰ্যাতন চলাই আহিছিল বুলি পৰিয়ালৰ লোকে অভিযোগ কৰিছে । যোৱা নিশা কাজিয়াই চুড়ান্ত ৰূপ লয় আৰু হত্যাৰ বলি হয় পত্নী চম্বাৰী কৰ্মকাৰ । স্থানীয় ৰাইজৰ এক সূত্ৰ মতে লক্ষীৰামে ঘৰত আনি লুকুৱাই থোৱা মদৰ বটল বিচাৰি পত্নী চম্বাৰীক অমানুষিক মাৰপিট কৰে আৰু অকথ্য নিৰ্যাতন চলাই হত্যা কৰে । পিছত দেবেৰাপাৰ আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰা লগতে হত্যাকাৰী স্বামী লক্ষীৰামক আটক কৰে । দেবেৰাপাৰ আৰক্ষীয়ে হত্যাকাৰী লক্ষীৰাম কৰ্মকাৰক গ্ৰেপ্তাৰ কৰিছে আৰু মৃতদেহটো মৰণোত্তৰ পৰীক্ষাৰ বাবে যোৰহাট চিকিৎসা মহাবিদ্যালয়লৈ প্ৰেৰণ কৰিছে । ঘটনাটোৱে সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে । এই ঘটনাই চাহ বাগিচা অঞ্চলসমূহত চুলাই মদৰ অবাধ প্ৰচলনৰ ফলত হত্যা, ধৰ্ষণ, চুৰি ডকাইতি আদিৰ দৰে অপৰাধ মূলক ঘটনা সংঘটিত হোৱাৰ কথাটোক পুনৰ প্ৰমাণ কৰিলে ।
প্ৰেৰক দিব্যজ্যোতি শইকীয়া