নিয়মীয়া বাৰ্তা, ৩ এপ্ৰিল : লাহৰীঘাটৰ কুশতলীত আজি তিৱা স্বায়ত্ত পৰিষদৰ পুঁজিৰে নিৰ্মাণ কৰি উলিওৱা এখন ৰাজহুৱা মঞ্চ আনুষ্ঠানিকভাৱে উদ্বোধন কৰা হয়। শ্ৰীমন্ত শংকৰদেৱ সংঘৰ কুশতলী আঞ্চলিক শাখাৰ কীৰ্ত্তন গৃহৰ চৌহদত এই ৰাজহুৱা মঞ্চখন নিৰ্মাণ কৰা হয়। তিৱা স্বায়ত্ত পৰিষদৰ অন্তৰ্গত ২নং বৰঙনি সমষ্টিৰ সদস্য তথা পৰিষদৰ উপাধ্যক্ষ অংকুৰ দেউৰীয়ে ২০২০-২১ বৰ্ষৰ উন্নয়ন পুঁজিৰ ১০ লাখ টকা ব্যয়ৰে নিৰ্মাণ কৰা ৰাজহুৱা মঞ্চখন আজি আনুষ্ঠানিকভাৱে শুভ উদ্বোধন কৰে শ্ৰীমন্ত শংকৰদেৱ সংঘৰ প্ৰধান সম্পাদক বাবুল বৰাই। একেদৰে তিৱা স্বায়ত্ত পৰিষদৰ উপাধ্যক্ষ অংকুৰ দেউৰীয়ে ফিতা কাটি মঞ্চটোৰ দ্বাৰ মুকলি কৰে। উল্লেখযোগ্য যে মঞ্চখন উদ্বোধনৰ পূৰ্বে উদ্বোধক তথা সংঘৰ প্ৰধান সম্পাদকগৰাকীক ফুলাম গামোচা, চেলেং,শৰাই আৰু জাপিৰে উপাধ্যক্ষ গৰাকীয়ে আদৰণি জনায়।অনুষ্ঠানটোত শ্ৰীমন্ত শংকৰদেৱ সংঘৰ শংকৰী পৰীক্ষা পৰিষদৰ কেন্দ্ৰীয় সচিব দীপাংকৰ বৰদলৈ, কুশতলী আৰু লাউভূৰুঙ্গা গাঁও পঞ্চায়তৰ সভাপতি দ্বয় ক্ৰমে ৰাজেন সেনাপতি,ৰাজু পাতৰ,কুশতলী মণ্ডল বিজেপিৰ সভাপতি জিলুৰাম পাতৰকে ধৰি বহু কেইবাগৰাকী বিশিষ্ট ব্যক্তি উপস্থিত থাকে।ইফালে ভৱনটো উদ্বোধন কৰি অঞ্চলটোৰ এটা দীৰ্ঘদিনীয়া অভাৱ পূৰণ হোৱা বুলি উদ্বোধক বাবুল বৰাই কয় আৰু ইয়াৰ বাবে তেওঁ তিৱা স্বায়ত্ব পৰিষদৰ মুখ্য কাৰ্যবাহী সদস্য জীৱন চন্দ্ৰ কোঁৱৰ আৰু উপাধ্যক্ষ অংকুৰ দেউৰীক কৃতজ্ঞতা জ্ঞাপন কৰে।
প্ৰেৰক আবুল কালাম