নিয়মীয়া বার্তা, ২৩ জানুৱাৰীঃ যেতিয়া এজন লোকক নিজৰ পৰিয়ালে মৃত বুলি ধৰি লয় আৰু তেওঁ পুনৰ ৪৮ বছৰৰ পাছত পৰিয়াললৈ ঘূৰি আহে, তেন্তে সেয়া আচৰিত ঘটনাতকৈ কোনোগুণে কম নহয় ।
এই আচৰিত ঘটনাটো সংঘটিত হৈছে বাংলাদেশত । হবিবুৰ ৰহমান নামৰ বাংলাদেশৰ লোকজনে চিমেণ্ট ব্যৱসায় কৰিছিল আৰু তেওঁৰ নিজৰ ৩০ বছৰ বয়সত এই ব্যৱসায়ৰ বাবেই ঘৰৰ পৰা আঁতৰত আছিল । কিন্তু অকস্মাৎ লোকজনৰ কোনো খবৰ পৰিয়ালে লাভ নকৰাত সকলো চিন্তিত হৈ পৰে । ইপিনে বহু বছৰ পাছতো পৰিয়ালে তেওঁক বিচাৰ-খোচাৰ কৰিও কোনো সন্ধান নোপোৱাত তেওঁক মৃত বুলি ধৰি লয় ।
পিচে ৪৮ বছৰৰ পাছত ৰহমানৰ আমেৰিকাত থকা পুতেক-বোৱাৰীয়েকে তেওঁক ফেচবুকৰ এটা ভিডিঅ’ত দেখা পায় । সেই ভিডিঅ’টোত এজন লোকে এখন চিকিৎসালয়ৰ সন্মুখত ভিক্ষা মাগি থকাৰ দৃশ্য দেখা পায় । ততাতৈয়াকৈ তেওঁ পৰিয়ালৰ অন্য লোকক চিকিৎসালয়খনত খবৰ কৰিবলৈ কোৱাত, পৰিয়ালৰ লোকে তেওঁৰ বিষয়ে অৱগত হয় ।
পাছত তেওঁক পৰিয়ালৰ লোকে চিকিৎসালয়খনৰ সমীপৰ পৰা উদ্ধাৰ কৰে । আৰু বিগত ৪৮ বছৰে নিৰুদ্দেশ হৈ থকা লোকজনক পৰিয়ালটোৱে আদৰি লয় ।