নিয়মীয়া বাৰ্তা,২০ মে’: আহমেদাবাদৰ নৰেন্দ্র মোদী ষ্টেডিয়ামত অহা ২৯ মে’ত অনুুষ্ঠিত হ’বলগীয়া চলিত আই পি এলৰ ফাইনেল খেলখন ৭.৩০ বজাৰ পৰিৱর্তে ৮ বজাৰ পৰা আৰম্ভ হ’ব৷ বর্ণিল সামৰণী অনুষ্ঠানৰ বাবে মেচৰ সময় আধাঘণ্টা পিছুৱাই দিয়া হৈছে৷ বি চি চি আইৰ এক সূত্রই সদৰী কৰা মতে, ‘৪০ মিনিটজোৰা সামৰণী অনুষ্ঠানৰ বাবে মেচখনৰ সময় ৮ বজালৈ পিছুৱাই দিয়া হৈছে৷ ক’ভিডৰ বাবে ২০১৯ৰ পিছত বি চি চি আয়ে প্রথমবাৰৰ বাবে সামৰণী অনুষ্ঠানৰ আয়োজন কৰিছে৷’ উল্লেখ্য যে বলীউডৰ অভিনেতা ৰণবীৰ সিং আৰু সংগীতজ্ঞ এ আৰ ৰহমানে সামৰণী অনুষ্ঠানত সংগীত পৰিৱেশন কৰিব৷ এই অনুষ্ঠানত ভাৰতৰ ৭৫ বছৰীয়া স্বাধীনতা আৰু ভাৰতীয় ক্রিকেটৰ বিগত সাতটা দশকৰ বিভিন্ন অনুষ্ঠান প্রদর্শিত হ’ব৷