নিয়মীয়া বাৰ্তা, ৩০ আগষ্ট: ধেমাজি আৰক্ষীয়ে অভিযান চলাই একেদিনাই ৯ খন চুৰি বাইকসহ তিনিটা চোৰৰ লগতে সাতজন ক্ৰেতাসহ ১০ জনক গ্ৰেপ্তাৰ কৰিছে ৷ জিলাখনত বিগত কিছুদিন ধৰি বহুকেইটা মটৰচাইকেল চুৰি গোচৰৰ সংক্ৰান্তত তদন্ত চলাই ধেমাজি আৰক্ষীয়ে কালি সফলতা লাভ কৰিবলৈ সক্ষম হয়। আৰক্ষীয়ে ৩ জন মটৰচাইকেল চোৰ ক্ৰমে প্ৰাঞ্জল বৰমুদৈ ওৰফে প্ৰাঞ্জল বৰুৱা(৩১) ভৱেশ কাদং(৩৯)আৰু ৰাজীৱ বুঢ়াগোহাঁই(২৬) বুলি জানিবলৈ দিছে ৷ আনহাতে ৬ জন চুৰি মটৰচাইকেল ক্ৰেতা ক্ৰমে ডিম্বেশ্বৰ পেগু , ডক্টৰ কুটুম , টিপু দলে , নৰ্ৰমাল কুলি ,হিমাংশু কুলি আৰু মেঘনাথ মিলিৰ সৈতে মুঠ ৯ জনক ধেমাজি আৰক্ষীয়ে গ্ৰেপ্তাৰ কৰিছে । আজি ধেমাজি সদৰ আৰক্ষী থানাত ধেমাজি জিলাৰ অতিৰিক্ত আৰক্ষী অধীক্ষক গৌৰৱ আগৰৱালা , উপ- আৰক্ষী অধীক্ষক আবুটানী দলে আৰু ধেমাজি সদৰ আৰক্ষী থানাৰ ভাৰপ্ৰাপ্ত আৰক্ষী বিষয়া হিতেশ শৰ্মাই সাংবাদিকক চুৰি মটৰচাইকেল উদ্ধাৰ আৰু ৯ জনৰ গ্ৰেপ্তাৰৰ সম্পৰ্কে অৱগত কৰি এই চুৰি চক্ৰৰ বিৰুদ্ধে ধাৰাবাহিক অভিযান চলোৱা হব বুলি অৱগত কৰে ৷