নিয়মীয়া বাৰ্তা, ২৮ ছেপ্টেম্বৰ: আজি গুৱাহাটী প্ৰেছ ক্লাবত অসমৰ জাতি সংঘ-অসম সন্মিলিত মহাসংঘই বিশিষ্ট গৱেষক ডক্টৰ ৰাতুল শইকীয়াক ৰাজহুৱা ভাবে অভিনন্দন আৰু কৃতজ্ঞতা জ্ঞাপন কৰে । শইকীয়াই তেওঁৰ “সাংবিধানিক বিধি ব্যৱস্থাত অসমৰ জনগোষ্ঠী সমূহৰ সুৰক্ষাৰ ব্যৱস্থা -এক বিশ্লেষণাত্মক অধ্যয়ন” শীৰ্ষক গৱেষণা পত্ৰৰ জড়িয়তে ৰাষ্ট্ৰসংঘৰ নীতিৰ আধাৰত খিলঞ্জীয়াৰ ভিত্তি বছৰ ১৮২৬ আৰু সংবিধানৰ আধাৰত স্বদেশী-বিদেশীৰ ভিত্তি বছৰ ১৯৫১ ন্যায়সঙ্গত আৰু সত্য বুলি তথ্য আৰু বিশ্লেষণ সহ প্ৰমাণিত কৰিলে । গুৱাহাটী বিশ্ববিদ্যালয়ে এই গৱেষণা পত্ৰৰ বাবে শইকীয়াক ডক্টৰেট ডিগ্ৰী প্ৰদান কৰে । গুৱাহাটী বিশ্ববিদ্যালয় আইন মহাবিদ্যালয়ৰ অৱসৰপ্ৰাপ্ত সহযোগী অধ্যাপক ডক্টৰ বিমল কুমাৰ বৈশ্যৰ তত্বাৱধানত প্ৰস্তুত কৰা এই গৱেষণা পত্ৰখনক পশ্চিম বংগৰ দুগৰাকী বিশেষজ্ঞ পৰীক্ষক ক্ৰমে -পশ্চিম বংগ ৰাষ্ট্ৰীয় বিধি বিজ্ঞান(JURIDICAL SCIENCE) বিশ্ববিদ্যালয়ৰ অধ্যাপক ডক্টৰ অৰূপ পোদ্দাৰ আৰু উত্তৰ বংগ বিশ্ববিদ্যালয়ৰ অধ্যাপক ডক্টৰ গঙ্গোত্ৰী চক্ৰৱৰ্তীয়ে স্বীকৃতি প্ৰদান কৰাটোও এটা উল্লেখযোগ্য ঘটনা ৰূপে পৰিগণিত হৈ ৰ’ব ।
মহাসংঘৰ কাৰ্যকৰী সভাপতি মতিউৰ ৰহমানৰ সভাপতিত্বত অনুষ্ঠিত হোৱা সভাত মহাসংঘই শইকীয়াক এখন অভিনন্দন আৰু কৃতজ্ঞতা পত্ৰ প্ৰদান কৰে ।
সভাত মুখ্য অতিথি হিচাপে সদৌ অসম খিলঞ্জীয়া ধৰ্মীয় সংখ্যালঘু পৰিষদৰ মুখ্য সভাপতি তথা গুৱাহাটী উচ্চ ন্যায়ালয়ৰ জেষ্ঠ অধিবক্তা কিৰণ কুমাৰ গগৈ আৰু বিশিষ্ট অতিথি হিচাপে সদৌ অসম আহোম সভাৰ সভাপতি উমাকান্ত কোঁৱৰে শইকীয়াৰ এই মহৎ কামৰ বাবে আন্তৰিক শুভেচ্ছা জনাই তেওঁৰ উত্তৰোত্তৰ উন্নতি কামনা কৰে । অসমীয়া জাতিৰ সংকট কালত শইকীয়াৰ এই গৱেষণা পত্ৰই জাতিক মাৰ্গ দৰ্শন কৰাব আৰু ভুল পথেৰে যোৱা সকলক শুদ্ধ পথ ল’বলৈ প্ৰেৰণা যোগাব বুলি আশা কৰে গগৈ আৰু কোঁৱৰে ।
শইকীয়াই গৱেষণা পত্ৰ প্ৰস্তুত কৰাৰ ক্ষেত্ৰত মতিউৰ ৰহমানে আগবঢ়োৱা তথ্য আৰু যুক্তিৰ কথা কৃতজ্ঞতাৰে সোঁৱৰণ কৰে ।
সভাৰ আত ধৰে মহাসংঘৰ মহা সচিব পূৰ্ণানন্দ ৰাভাই । এই গৱেষণা পত্ৰত অসমৰ খিলঞ্জীয়া জনগোষ্ঠীসমূহৰ তথা অসমীয়া জাতিৰ সংজ্ঞা দাঙি ধৰাৰ লগতে বিপদাপন্ন জনগোষ্ঠীসমূহক সাংবিধানিক বিধি ব্যৱস্থাৰ ভিতৰত কেনেদৰে সুৰক্ষিত কৰিব পাৰি তাৰ বাবেও পৰামৰ্শ দাঙি ধৰিছে । আন্তঃৰাষ্ট্ৰীয় নীতিৰ আধাৰত ১৮২৬ চনৰ ২৪ ফেব্ৰুৱাৰীত( ইয়াণ্ডাবু সন্ধি ) অসমত বসবাস কৰি থকা জনগোষ্ঠী সমূহৰ বৰ্তমানৰ বংশধৰসকলকহে খিলঞ্জীয়া ৰূপে অভিহিত কৰিছে ।
লগতে ১৮২৬ চনৰ ২৪ ফেব্ৰুৱাৰীৰ পিছত আৰু ১৯৫১ চনত ৰাষ্ট্ৰীয় নাগৰিক পঞ্জী প্ৰস্তুত কৰাৰ আগতে অসমলৈ অহা জনগোষ্ঠীসমূহক অ-খিলঞ্জীয়া ভাৰতীয় নাগৰিক ৰূপে অভিহিত কৰিছে । এই গুৰুত্বপূৰ্ণ গৱেষণা পত্ৰখনৰ জড়িয়তে অসমৰ সকলো ৰাজনৈতিক দল আৰু জাতীয় সংগঠনবোৰে খিলঞ্জীয়া সকলৰ সুৰক্ষাৰ ক্ষেত্ৰত সঠিক দিশেৰে আগবাঢ়ি যাবলৈ অনুপ্ৰেৰণা লাভ কৰিব বুলি বিশ্বাস । অসমৰ জাতি সংঘ — অসম সন্মিলিত মহাসংঘৰ কাৰ্যকৰী সভাপতি মতিউৰ ৰহমানে গভীৰ ভাবে আশা কৰে যে এই গৱেষণা পত্ৰই অসমৰ খিলঞ্জীয়া জনগোষ্ঠীসমূহক শুদ্ধ পথেৰে আগবাঢ়ি যাবলৈ সাহস আৰু প্ৰেৰণা যোগাব । এই গৱেষণা পত্ৰ খনৰ বাবে ডক্টৰ শইকীয়াক আন্তৰিক অভিনন্দন আৰু কৃতজ্ঞতা জনোৱাৰ লগতে সু-স্বাস্থ্য আৰু দীৰ্ঘায়ু কামনা কৰিছে মহাসংঘই ।