নিয়মীয়া বাৰ্তা, ৭ অক্টোবৰঃ বোকাজান পৌৰসভাৰ ৭ নং ৱাৰ্ডৰ শুখানজান প্লাইউড নামৰ ঠাইত এটা নলাত পৰি থকা অৱস্থাত এগৰাকী মহিলাৰ মৃতদেহ উদ্ধাৰ হোৱা ঘটনাক কেন্দ্ৰ কৰি চাঞ্চল্যৰ সৃষ্টি হৈছে। জানিব পৰা মতে, আজি দুপৰীয়াৰ ভাগত নলাটোৰ পৰা দুৰ্গন্ধ ওলোৱাৰ ফলত স্থানীয় লোকে অনুসন্ধান চলাই মহিলাগৰাকীৰ মৃতদেহটো উদ্ধাৰ কৰা হয়। মৃতদেহটো বোকাজানৰ লক্ষীজান ভূজেল বস্তিৰ প্ৰেম ভূজেলৰ পত্নী সৰিতা থাপা (৪০) ৰ বুলি চিনাক্ত কৰা হৈছে। স্থানীয় লোকে জানিবলৈ দিয়া অনুসৰি যোৱা ৫ অক্টোবৰত কোনো পৰিয়ালৰ ঘৰলৈ বুলি ওলাই অহাৰ পিছৰে পৰা মহিলাগৰাকী নিখোজ হৈ আছিল। উল্লেখ্য যে, ঘটনাস্থলীত বোকাজান আৰক্ষী উপস্থিত হৈ মৃতদেহ উদ্ধাৰ কৰাৰ লগতে মৰণোত্তৰ পৰীক্ষাৰ বাবে ব্যৱস্থা গ্ৰহণ কৰে।