নিয়মীয়াবাৰ্তা, ১০জানুৱাৰী: অসমে চলিত ছিজনৰ ৰঞ্জি ট্রফীত এতিয়ালৈকে পৰাজয়ৰ মুখ দেখা নাই৷ এলিট গ্রুপ ‘বি’ত স্থান লাভ কৰা অসম আজিৰ পৰা আৰম্ভ হ’বলগীয়া গুৰুত্বপূর্ণ মেচখনত শক্তিশালী মুম্বাইৰ মুখামুখি হ’ব৷ দুয়ো দলৰ মাজৰ মেচখন আজিৰ পৰা গুৱাহাটীৰ আমিনগাঁও ক্রিকেট গ্রাউণ্ডত চাৰিদিনীয়াকৈ অনুষ্ঠিত হ’ব৷ আজিৰ পৰা আৰম্ভ হ’বলগীয়া মেচখনত অসম দলটোত কিছু সালসলনি ঘটাইছে অসম ক্রিকেট সন্থাই৷ মেচখনত কুণাল শইকীয়াৰ পৰিৱর্তে গোকুল শর্মাই অসম দলটোক নেতৃত্ব দিব৷ মেচখনত ঘৰুৱা দল অসমে শক্তিশালী মুম্বাইৰ পৰা কঠিন প্রত্যাহ্বান লাভ কৰাটো নিশ্চিত৷ কিয়নো, মুম্বাই দলটোত টীম ইণ্ডিয়াৰ তাৰকা খেলুৱৈ আজিংক্য ৰাহানেৰ লগতে পৃথ্বি শ্ব, যশস্বী জয়ছোৱাল আৰু ছৰফৰাজ খানৰ দৰে খেলুৱৈ আছে৷ মুম্বাই দলটোৰ নেতৃত্বত আছে আজিংক্য ৰাহানে৷ গতিকে মেচখনত মুম্বাইৰ বিপক্ষে জয়লাভ কৰিবলৈ হ’লে ঘৰুৱা দল অসমে যথেষ্ট কষ্ট কৰিব লাগিব৷
মন কৰিবলগীয়া যে অসমে এতিয়ালৈকে চাৰিখন মেচৰ এখনত জয় আৰু তিনিখন ড্র খেলি ১১ পইণ্টৰে গ্রুপ ‘বি’ৰ পইণ্ট তালিকাৰ পঞ্চম স্থানত থকাৰ বিপৰীতে মুম্বায়ে চাৰিখন মেচৰ দুখনত জয়, এখনত পৰাস্ত আৰু এখন ড্র খেলি ১৬ পইণ্টৰে দ্বিতীয় স্থানত আছে৷