নিয়মীয়া বাৰ্তা, ১৪ ফেব্ৰুৱাৰী: বৰপেটা জিলাৰ সৰভোগৰ কলবাৰীত ভূমি বিবাদক কেন্দ্ৰ কৰি দুই ফৈদৰ সংঘাতৰ ভয়াবহ ৰূপ। আব্দুল আজিজৰ ঘৰত অগ্নি সংযোগ। এই ঘটনাত তিনিটাকৈ বাসগৃহ জ্বলি ভস্মীভূত হোৱাৰ লগতে জীৱন্তে অগ্নিদগ্ধ হৈ আচিমন নেচা নামৰ এগৰাকী 55 বছৰীয়া বৃদ্ধাৰ মৃত্যু হয় । আনহাতে ছাইফুল আলী আৰু হাশমত আলী নামৰ আন দুজনকৈ লোক চিকিৎসালয়ত মৃত্যু হোৱাৰ লগতে আব্দুল বাতেন আৰু আব্দুল বাছিত নামৰ দুজনকৈ ব্যক্তি সংকটজনক অৱস্থাত চিকিৎসালয়ত ভৰ্তি হৈ আছে ৷ দুয়োপক্ষৰ কাজিয়াত কেইবাখনো সৰু ডাঙৰ পুৰি ভস্মীভূত হোৱাৰ লগতে ভাঙি পেলায়। ঘটনাস্থলীত বৰপেটা জিলাৰ আৰক্ষী অধীক্ষক অমিতাভ সিংহাৰ নেতৃত্বত বিশাল সেনাৰ দল উপস্থিত হৈ পৰিস্থিতি নিয়ন্ত্ৰণ কৰাৰ লগতে দুয়োপক্ষৰ ১৪ জনকৈ লোকক আটক কৰি সৰভোগ থানালৈ লৈ আহে। প্ৰায় ৫০ জনীয়া দূৰ্বৃত্তৰ দলে আক্ৰমণ কৰিছিল বুলি ভুক্তভোগী পৰিয়ালৰ লোকে জানিবলৈ দিয়ে ৷ অৱশ্যে আৰক্ষীয়ে তদন্ত আৰম্ভ কৰিছে বুলি জানিব পৰা গৈছে।