নিয়মীয়া বাৰ্তা, ২০ এপ্ৰিল: দ্বিতীয়টো সন্তানৰ পিতৃ হোৱাৰ দিশে আগবাঢ়িছে বিশ্বৰ অন্যতম শ্রেষ্ঠ ফুটবলাৰ ব্রাজিল তথা পেৰিছ ছেইণ্ট জার্মেইনৰ নেইমাৰ৷ বুধবাৰে এখন ছবি ছ’চিয়েল মিডিয়াত পোষ্ট কৰি এই খবৰ সদৰী কৰিছে ব্রাজিলৰ ফুটবলাৰগৰাকীয়ে৷ নেইমাৰে ছ’চিয়েল মিডিয়াত প্রেমিকা ব্রুনা বিয়ানকার্ডিৰ সৈতে ‘বেবী বাম্প’ৰ ছবি প্রকাশ কৰিছে৷ এনে খবৰ শুনি অনুৰাগীয়ে শুভেচ্ছা প্রদান কৰিছে নেইমাৰ আৰু ব্রুনাক৷ নেইমাৰৰ প্রেমিকা ব্রুনাই ইতিমধ্যে ছ’চিয়েল মিডিয়াত মুঠ পাঁচখন ফটো পোষ্ট কৰিছে৷ উল্লেখ্য যে ৩১ বছৰীয়া নেইমাৰে ২০২১ চনৰ পৰা ব্রুনাৰ সৈতে থাকিবলৈ আৰম্ভ কৰিছিল৷ ২০২২ চনৰ জানুৱাৰীত এই বিষয়টো ৰাজহুৱা হয়৷ নেইমাৰ আৰু ব্রুনাৰ জীৱনৰ এইটোৱে হ’ব প্রথমটো সন্তান৷ ইয়াৰ পূর্বে ২০১১ চনত নেইমাৰে মাত্র ১৯ বছৰ বয়সতে পিতৃত্বৰ গৌৰৱ অর্জন কৰিছিল৷ তেওঁৰ পুত্রৰ নাম ডেভিদ লুকা৷ লুকা হ’ল নেইমাৰ আৰু তেওঁৰ প্রাক্তন প্রেমিকা কেৰ’লিনা ডাণ্টাছৰ সন্তান৷