🔹 আই পি এলত অনিশ্চিত পাণ্ডিয়া !
বিশেষ বাৰ্তা, ২৩ ডিচেম্বৰ : মুম্বাই ইণ্ডিয়ানছৰ শিবিৰত এক বৃহৎ জোকাৰণি। কিছুদিন পূৰ্বে মুম্বাই ইণ্ডিয়ানছে হাৰ্দিক পাণ্ডিয়াক অধিনায়ক হিচাপে ঘোষণা কৰিছিল। কিন্তু আঘাতৰ বাবে হয়তো অহা ছিজনত হাৰ্দিকে আই পি এল খেলিব নোৱাৰিব পাৰে। সংবাদ মাধ্যমৰ বাতৰি অনুসৰি, বিশ্বকাপত গোৰোহাত পোৱা আঘাতৰ পৰা এতিয়াও সুস্থ হ’ব পৰা নাই হাৰ্দিক। সেইবাবেই তেওঁক বিশ্বকাপৰ পাছত ভাৰতীয় জাৰ্ছী পিন্ধা দেখা পোৱা নগ’ল। অষ্ট্ৰেলিয়াৰ বিৰুদ্ধে টি-২০ শৃংখলা আৰু দক্ষিণ আফ্ৰিকা ভ্ৰমণত তেওঁক লোৱা হোৱা নাছিল। জানুৱাৰীত আফগানিস্তানৰ বিৰুদ্ধেও টি-২০ শৃংখলাত খেলিব নোৱাৰিব পাৰে হাৰ্দিকে। অহা বছৰৰ মাৰ্চ মাহত অনুষ্ঠিত হ’ব আই পি এল। সেই সময়লৈকে হাৰ্দিকে পুনৰ খেলপথাৰত নামিব পাৰিব নে নাই, তাক লৈ সন্দিহান হৈ পৰিছে মুম্বাই ইণ্ডিয়ানছ শিবিৰ। এতিয়া যদি হাৰ্দিকে সঁচাকৈয়ে আই পি এল খেলিব নোৱাৰে, তেন্তে মুম্বায়ে অধিনায়ক সলনি কৰিব লাগিব। তেনে ক্ষেত্ৰত ৰোহিতক পুনৰ দায়িত্ব দিয়া হ’ব নে মুম্বায়ে নতুন কাৰোবাৰ নাম ঘোষণা কৰে, সেয়া লক্ষণীয়া যাব।