নিয়মীয়া বাৰ্তা ২৬ ফেব্ৰুৱাৰীঃ ৰাজ্যৰ শিক্ষা বিভাগত আমূল পৰিৱর্তন সাধনৰ উদ্দেশ্যে অসম উচ্চতৰ মাধ্যমিক শিক্ষা সংসদে গ্রহণ কৰিছে আন এক ব্যতিক্রমী পদক্ষেপ৷ ২০১০ বর্ষৰ পিছত প্রথমবাৰলৈ সলনি হ’ব উচ্চতৰ মাধ্যমিকৰ পাঠ্যক্রম৷ যাৰ বাবে ইতিমধ্যে অসম উচচতৰ মাধ্যমিক শিক্ষা সংসদে আৰম্ভ কৰিছে যাৱতীয় প্রস্তুতি৷ চলিত বর্ষত অথবা আগন্তুক ২০২১ বর্ষৰ ভিতৰত শিক্ষা সংসদে সলনি কৰিব উচ্চতৰ মাধ্যমিকৰ দুবছৰীয়া পাঠ্যক্রম৷ ইয়াকে লৈ মার্চ মাহত গঠন কৰা হ’ব এখন বিশেষ কমিটী৷ শিক্ষা সংসদৰ অধ্যক্ষ ড০ দয়ানন্দ বৰগোহাঁই আৰু সচিব মনোৰঞ্জন কাকতিক লৈ গঠন হ’ব এই পাঁচজনীয়া কমিটী৷ উল্লেখ্য যে এই কমিটীখনৰ সদস্যসকলে চোৱা–চিতা কৰিব উচ্চতৰ মাধ্যমিকত কি কি পাঠ্যক্রম সলনি কৰিব আৰু কি কি নতুনকৈ অন্তর্ভুক্ত কৰিব৷ পাঠ্যক্রম সলনি কৰা সম্পর্কত সচিব মনোৰঞ্জন কাকতিয়ে এই সম্পর্কত কয় যে এই বছৰ পাঠ্যক্রম সলনি কৰাৰ বাবে কিছু অসুবিধা হ’ব পাৰে, কিন্তু অহা বছৰ পাঠ্যক্রম সলনি কৰাটো নিশ্চিত৷’ ইফালে ৰাজ্যত বৃত্তিগত শাখাত ক্রমান্বয়ে ছাত্র–ছাত্রী হ্রাস পোৱাৰ বাবে শিক্ষা সংসদে গ্রহণ কৰিছে আন এক পদক্ষেপ৷বর্তমানৰ ১৫টা বিষয়ৰ পৰিৱর্তে ২৫টালৈ বৃদ্ধি কৰা হৈছে বৃত্তিগত বিষয়৷ লক্ষণীয় যে চলিত বর্ষৰ পৰাই ছাত্র–ছাত্রীসকলে ল’ব পাৰিব এই নতুন বিষয়সমূহ৷ উল্লেখ্য যে ২০১৯–২০ বর্ষৰ উচ্চতৰ মাধ্যমিকৰ চূডান্ত বর্ষৰ পৰীক্ষাৰ বৃত্তিমুখী শাখাত অৱতীর্ণ হৈছে মাত্র ৮৬৮জন৷ ইয়াৰ পূর্বে ২০১৮–১৯ বর্ষত ছাত্র–ছাত্রীৰ সংখ্যা আছিল ৯১০ গৰাকী৷