🔹 আইপিএল : বিশ্বৰ সর্ববৃহৎ ক্রিকেট লীগৰ মেগা নিলাম
নিউজ ডেস্ক, ৫ নৱেম্বৰ : বিশ্বৰ সর্ববৃহৎ ক্রিকেট লীগ ইণ্ডিয়ান প্রিমিয়াৰ লীগ–২০২৫ৰ মেগা নিলামৰ সম্ভাব্য তাৰিখ আৰু স্থান সোমবাৰে প্রকাশ কৰা হৈছে৷ সংবাদ প্রতিষ্ঠানৰ তথ্য অনুসৰি, আগন্তুক আইপিএলৰ বাবে বৃহৎ নিলাম ২৪ আৰু ২৫ নৱেম্বৰত ছৌদি আৰবৰ ৰিয়াধত অনুষ্ঠিত হোৱাৰ সম্ভাৱনা আছে৷ এই সংক্রান্তত যাৱতীয় সকলো ব্যৱস্থা গ্রহণ কৰা হৈছে আৰু শীঘ্রে চূড়ান্ত সিদ্ধান্ত প্রকাশৰ সম্ভাৱনা আছে৷ অৱশ্যে, ভাৰতীয় ক্রিকেট নিয়ন্ত্রণ ব’র্ডে এতিয়াও আনুষ্ঠানিকভাৱে নিলামৰ স্থান বা তাৰিখ ঘোষণা কৰা নাই৷ প্রতিবেদন অনুসৰি, বিচিচিআইৰ বিষয়াসকলে ইতিমধ্যে সম্ভাব্য স্থানসমূহৰ মূল্যাংকন কৰিবলৈ ছৌদি আৰবলৈ প্রাৰম্ভিক ভ্রমণ কৰিছে৷ অৱশ্যে চূড়ান্ত সিদ্ধান্ত গ্রহণৰ পূর্বে সোমবাৰে দ্বিতীয়টো প্রতিনিধি দলে উপসাগৰীয় ৰাষ্ট্রখন ভ্রমণ কৰাৰ সম্ভাৱনা আছে৷ আইপিএল–২০২৫ৰ মেগা নিলামৰ বাবে প্রথমতে জেদ্দাৰ নাম বিবেচনা কৰা হৈছিল যদিও ৰাজধানী চহৰ ৰিয়াধক দুদিনীয়া নিলামৰ বাবে আটাহতকৈ সুবিধাজনক আয়োজক চহৰ হিচাপে নির্বাচিত কৰে৷ বিচিচিআয়ে ডুবাই, ছিংগাপুৰ, আনকি ভিয়েনাৰ দৰে অন্যান্য আন্তঃৰাষ্ট্রীয় স্থানসমূহৰ নামো বিবেচনা কৰিছিল৷ কিন্তু পৰৱর্তী সময়ত ছৌদি আৰবক আদর্শ স্থান হিচাপে বাছনি কৰা হৈছে৷