নিয়মীয়া বাৰ্তা, ১৫ মাৰ্চঃ আৰক্ষী অপৰাধ অনুসন্ধান শাখাই আজি অভিযান চলাই মহানগৰীৰ গুৱাহাটী ক্লাব আৰু গান্ধীবস্তিৰ পৰা বৃহৎ পৰিমাণৰ ড্রাগ্ছ জব্দ কৰাৰ লগতে মহিলাসহ দুজন যুৱকক গ্রেপ্তাৰ কৰে৷ আৰক্ষী সূত্রই জনোৱা মতে, গোপন সূত্রৰ পম খেদি শনিবাৰে আৰক্ষী অপৰাধ অনুসন্ধান শাখাই চানমাৰি থানাৰ অন্তর্গত গান্ধীবস্তি ৰে’ল গেটৰ সমীপত অভিযান চলায়৷ অভিযানকাৰী দলটোৱে উক্ত স্থানৰ পৰা ড্রাগ্ছ সৰবৰাৰ অভিযোগত নগাঁও আৰু মৰিগাঁৱৰ দুগৰাকী মহিলা ক্রমে ছফিয়া বেগম আৰু মনোৱাৰা বেগম ক গ্রেপ্তাৰ কৰে৷ ধৃত মহিলা দুগৰাকীৰ পৰা আৰক্ষীয়ে ড্রাগ্ছভর্তি ১৫টা কনটেইনাৰ, দুটা ম’বাইল ফোন আৰু নগদ ২২,৭৯০ টকা জব্দ কৰে৷
ইপিনে, অপৰাধ অনুসন্ধান শাখাই অভিযান চলাই গুৱাহাটী ক্লাবৰ বাছ আস্থানৰ পৰা প্রায় ১০ গ্রাম ড্রাগ্ছ জব্দ কৰাৰ লগতে দুজন সৰবৰাহকাৰী যুৱকক হাতেলোটে গ্রেপ্তাৰ কৰে৷ ধৃত যুৱক দুজন বৰপেটা জিলাৰ পালহাজী অঞ্চলৰ ফাৰুক খান আৰু মহিদুল ইছলাম ৷ আৰক্ষীয়ে ঘটনা সন্দর্ভত পৃথকে পৃথকে গোচৰ ৰুজু কৰি তদন্ত অব্যাহত ৰাখিছে৷