🔹 অদ্ভুত কাণ্ডত নিদ্রাহৰণ চাফাই কর্মীৰ
নিউজ ডেস্ক, ৩ এপ্রিল : কোটি টকাৰ কথা কাণেৰে শুনিলেও জীৱনত কোনোদিনে চকুৰে দেখাৰ সৌভাগ্য হোৱা নাই৷ চাফাই কর্মী হিচাপে কাম কৰি মাহত উপার্জন কৰে টানি–টুনি ১৫ হাজাৰ টকা৷ এই টকাৰে কোনোমতে সংসাৰ চলায়৷ উত্তৰ প্রদেশৰ আলিগড়ৰ বাসিন্দা এই চাফাই কর্মী কৰণ বাল্মীকিলৈ ৩৩ কোটি ৮৮ লাখ টকাৰ আয়কৰৰ জাননী পঠিওৱা হ’ল৷ আয়কৰ বিভাগে এই ধন শীঘ্রে আদায় নিদিলে আইনী পদক্ষেপ গ্রহণ কৰিব বুলিও হুংকাৰ দিছে৷ চৰকাৰী বিভাগৰ পৰা এনে পত্র পাই এতিয়া নিদ্রা নোহোৱা হৈছে কৰণৰ৷ জানিব পৰা গৈছে যে আলিগড়ৰ ষ্টেট বেংকৰ খাইৰ শাখাৰ চাফাই কর্মী হিচাপে কর্মৰত কৰণ বাল্মীকি৷ মাহত দৰমহা পায় প্রায় ১৫ হাজাৰ টকা৷ কৰণে দাবী কৰা অনুসৰি যোৱা ২৯ মার্চত আয়কৰ বিভাগৰ পৰা তেওঁলৈ জাননী আহে৷ এই জাননীত কোৱা হয় যে ৩৩ কোটি ৮৮ লাখ ৮৫ হাজাৰ ৩৬৮ টকাৰ লেনদেন কৰিছে কৰণে৷ ৩১ মার্চৰ ভিতৰত এই জাননী সন্দর্ভত মতামত জনাবলৈ নির্দেশ দিয়া হৈছে কৰণক৷ এই সন্দর্ভত আৰক্ষী থানালৈ গৈ কৰণে সবিশেষ জনায় যদিও আৰক্ষীয়ে অভিযোগ ল’বলৈ অস্বীকাৰ কৰিছে৷ লক্ষণীয়ভাৱে আয়কৰ বিভাগৰ তৰফৰ পৰা এই সন্দর্ভত কোনোধৰণৰ ভুল স্বীকাৰ কৰি পত্র প্রেৰণ কৰা নাই কৰণলৈ৷ গতিকে এনে পৰিস্থিতিত আতংকত ভুগিবলগীয়া হৈছে যুৱকজনে৷ লক্ষণীয়ভাৱে আয়কৰ বিভাগৰ এনে অদ্ভুত জাননী এয়াই প্রথম নহয়৷ ইয়াৰ পূর্বেও মধ্যপ্রদেশৰ এজন কণী বিক্রেতাক ৫০ কোটি টকাৰ জাননী প্রেৰণ কৰিছিল আয়কৰ বিভাগে৷ উত্তৰ প্রদেশৰ এজন ফল বিক্রেতাক ৭ কোটি টকাৰ জিএছটি আদায়ৰ নির্দেশেৰে জাননী প্রেৰণ কৰিও আয়কৰে হাহাকাৰ পৰিস্থিতিৰ সৃষ্টি কৰিছিল৷