🔹 অংগদাতাক উৎসাহিত কৰাৰ লক্ষ্যৰে কেন্দ্রীয় চৰকাৰৰ বিশেষ পদক্ষেপ
নিউজ ডেস্ক, ৩ এপ্রিল : অংগদান মহান কাম৷ অংগদাতাক উৎসাহিত কৰাৰ লক্ষ্যৰে কেন্দ্রীয় চৰকাৰে বিশেষ পদক্ষেপ গ্রহণ কৰিছে৷ অংগদান কৰা কেন্দ্রীয় চৰকাৰৰ কর্মচাৰীক ৪২ দিনৰ বিশেষ কেজুৱেল লীভ প্রদান কৰাৰ সিদ্ধান্ত গ্রহণ কৰিছে৷ কেন্দ্রীয় ৰাজ্যিক কর্মচাৰী মন্ত্রালয়ৰ মন্ত্রী জিতেন্দ্র সিঙে সংসদত লিখিত প্রশ্ণৰ উত্তৰত এই ঘোষণা কৰিছে৷ প্রশ্ণকালীন ঘণ্টাত কেন্দ্রীয় মন্ত্রী সিঙে কয় যে যিসকল কেন্দ্রীয় চৰকাৰৰ চাকৰিয়ালে অংগদান কৰিব বিচাৰে কিম্বা অংগদান কৰে, তেনে কর্মচাৰীক ৪২ দিনৰ বিশেষ কেজুৱেল লীভ দিয়া হ’ব৷ লোকসভাত মন্ত্রীগৰাকীয়ে কয়– ভাৰত চৰকাৰে অংগদাতা কেন্দ্রীয় চৰকাৰৰ কর্মচাৰীক সর্বোচ্চ ৪২ দিনৰ বিশেষ ছুটী দিব৷ অৱশ্যে চিকিৎসকে অংগদান কৰা ব্যক্তিজনৰ এই ছুটীৰ বাবে অনুমোদন জনাব লাগিব৷ চৰকাৰৰ পঞ্জীয়নভুক্ত চিকিৎসকে এই অনুমোদন জনোৱাটো বাধ্যতামূলক৷ উল্লেখ্য যে অংগদান কৰিবলৈ চিকিৎসালয়ত ভর্তি হোৱাৰ পিছৰে পৰা এই বিশেষ ছুটীৰ প্রক্রিয়া আৰম্ভ হ’ব৷