জুবিনক্ষেত্রক লৈ চৰকাৰে জাৰি কৰা এছঅ’পিৰ বিষয়ত নিজ স্থিতিত অটল আছে মুখ্যমন্ত্রী ড০ হিমন্ত বিশ্ব শর্মা৷ অকল সেয়াই নহয়, এছঅ’পি উলংঘা কৰাসকলক মুখ্যমন্ত্রী ড০ শর্মাই সকীয়াই দিছে৷
সংবাদ মাধ্যমৰে হোৱা বার্তালাপত এই সম্পর্কত সোধা এক প্রশ্ণৰ উত্তৰ দি জুবিনক্ষেত্রত কোনোবাই আইন ভংগ কৰিলে নিজে বিপদত পৰিব বুলি মুখ্যমন্ত্ৰীয়ে স্পষ্ট কৰি দিয়ে৷ মুখ্যমন্ত্রী ড০ শর্মাই কয় যে কোনোবাই যদি আইন ভংগ কৰে, আইনে তাৰ ব্যৱস্থা ল’ব৷ সেনা মোতায়েন কৰি আমি জুবিনক্ষেত্র ৰাখিব নোৱাৰোঁ৷ আইন মানিলে ভাল৷ আইন নামানিলে নিজে বিপদত পৰিব৷
আৰক্ষীয়ে কাকো বাধা নিদিয়ে বুলি উল্লেখ কৰি তেওঁ পুনৰ কয়- আইন মানুহৰ কাৰণে৷ আমি এটা নিয়ম বনাইছোঁ৷ নিয়ম পালন কৰাটো মানুহৰ দায়িত্ব৷ আৰু যদি কোনোবাই ভাবে– নহয়, আমি গোটেই ৰাতি তালৈ যাম, যিসকলে যাব, তাত যদি কিবা গণ্ডগোল হয় তাৰ বাবে তেওঁলোকেই দায়ী হ’ব৷ যিসকল মানুহে আইন ভংগ কৰিব, পিছত যদি তাত কিবা বিপদ হয় আইনে তেওঁলোকৰ ওপৰত ব্যৱস্থা ল’ব৷
জুবিনক্ষেত্রত প্রৱেশৰ সময় বঢ়াই দিয়া সন্দর্ভত তেওঁ কয় যে কোনোবাই কোনোবাই মোক অনুৰোধ কৰিছিল– ১ ঘণ্টা বঢ়াই দিব লাগে৷ মই কৈছোঁ, ঠিক আছে নিশা ১১ বজালৈ খোলা থাকিব জুবিনক্ষেত্ৰ ৷
ইফালে, কালি নিশাও সুৰাপান কৰি জুবিনক্ষেত্ৰত প্ৰৱেশ কৰে একাংশই। সুৰাৰ ৰাগিত মাতাল হৈ অহা এজনক জুবিন অনুৰাগীয়ে জবাবদিহি কৰাৰ পিছত আৰক্ষীয়ে আঁতৰাই লৈ যায় সুৰাপায়ী যুৱকজনক।
ডিজিটেল ডেস্ক, ২৬ অক্টোবৰ