টীম ইণ্ডিয়াৰ খেলুৱৈলৈ নিৰ্দেশনা বিচিচিআইৰ, ৰোহিত-কোহলি-পণ্টৰ নিশ্চিতি প্ৰদান

সম্প্রতি দক্ষিণ আফ্রিকাৰ বিপক্ষে পাঁচখনীয়া টি–২০ মেচত অংশ লৈ আছে ঘৰুৱা দল টীম ইণ্ডিয়াই৷ টি–২০ শৃংখলাটোৰ পূর্বে ভাৰতীয় দলটোৱে প্রটিয়াজ বাহিনীৰ সৈতে দুখন টেষ্ট আৰু তিনিখন এদিনীয়া মেচতো ভাগ লৈছিল৷

দক্ষিণ আফ্রিকাৰ বিপক্ষে চলি থকা টি–২০ শৃংখলাটোৰ মাজতে ভাৰতীয় ক্রিকেট নিয়ন্ত্রণ ব’র্ডে এক ডাঙৰ সিদ্ধান্ত গ্রহণ কৰিছে৷ বিচিচিআয়ে এদিনীয়া আৰু টি–২০ দলৰ খেলুৱৈসকলৰ বাবে নতুন নির্দেশনা জাৰি কৰিছে৷ যাৰ অধীনত তেওঁলোকে গুৰুত্বপূর্ণ ঘৰুৱা প্রতিযোগিতাৰ কমেও দুখনকৈ মেচ খেলিব লাগিব৷

টীম ইণ্ডিয়াৰ প্রতিজন খেলুৱৈয়ে এই নির্দেশনা মানি চলিব লাগিব৷ সংবাদ মাধ্যমৰ বাতৰি অনুসৰি বিচিচিআয়ে সিদ্ধান্ত লৈছে যে ভাৰতীয় এদিনীয়া আৰু টি–২০ দলৰ সকলো খেলুৱৈয়ে বিজয় হাজাৰে ট্রফী ২০২৫–২৬ত কমেও দুখন মেচ খেলিব লাগিব৷

খেলুৱৈসকলৰ মেচ ফিটনেছ বজাই ৰাখিবলৈ আৰু ঘৰুৱা ক্রিকেট শক্তিশালী কৰিবলৈ এই নির্দেশ দিয়া হৈছে৷ বিজয় হাজাৰে ট্রফী হৈছে ভাৰতৰ এখন গুৰুত্বপূর্ণ ঘৰুৱা লিষ্ট এ প্রতিযোগিতা৷ অহা ২৪ ডিচেম্বৰৰ পৰা প্রতিযোগিতাখন আৰম্ভ হ’ব৷

এই সিদ্ধান্তই বিশেষকৈ আন্তঃৰাষ্ট্রীয় সময়সূচীৰ বাবে ঘৰুৱা ক্রিকেটৰ পৰা দীর্ঘদিন আঁতৰি থকা জ্যেষ্ঠ খেলুৱৈসকলক প্রভাৱিত কৰিব৷ বিচিচিআইৰ নীতি অনুসৰি কেন্দ্রীয়ভাৱে চুক্তিবদ্ধ খেলুৱৈসকলে যেতিয়াই ৰাষ্ট্রীয় কর্তব্যৰ পৰা মুক্ত হ’ব, তেতিয়াই ঘৰুৱা প্রতিযোগিতাত অংশ লোৱাতো বাধ্যতামূলক৷

ইয়াৰ দ্বাৰা খেলুৱৈয়ে কেৱল ধাৰাবাহিকভাৱে অনুশীলন কৰিব পৰাই নহয়, যুৱ খেলুৱৈসকলে জ্যেষ্ঠসকলৰ পৰা শিকিবলৈও সুযোগ পাব৷ ইয়াৰ পূর্বে ৰঞ্জি ট্রফীৰ সময়ত বহুকেইজন জ্যেষ্ঠ খেলুৱৈয়ে নিজ দলৰ হৈ খেলিছিল৷

উল্লেখ্য যে ২৪ ডিচেম্বৰৰ পৰা আৰম্ভ হ’বলগীয়া বিজয় হাজাৰে ট্রফীত অংশগ্রহণ কৰিব টীম ইণ্ডিয়াৰ জ্যেষ্ঠ খেলুৱৈ বিৰাট কোহলিৰ লগতে তাৰকা উইকেটকীপাৰ–বেটাৰ ঋষভ পণ্টে৷ অহা বর্ষৰ ১৮ জানুৱাৰীলৈকে চলিবলগীয়া প্রতিযোগিতাখনত অংশগ্রহণ কৰিব বুলি কোহলিয়ে ইতিমধ্যে দিল্লী ক্রিকেট সংস্থাক অৱগত কৰিছে৷

খবৰ অনুসৰি তেওঁ দুখন মেচ খেলিব৷ কোহলিয়ে ২০১০ চনত অন্তিম বাৰৰ বাবে বিজয় হাজাৰে ট্রফীত অংশগ্রহণ কৰিছিল৷ আনহাতে ২০১৮ চনৰ ১৭ অক্টোবৰত অন্তিমবাৰৰ বাবে অংশগ্রহণ কৰা ৰোহিত শর্মাকো বিজয় হাজাৰে ট্রফীত দেখা যাব৷

ডিজিটেল ডেস্ক, ১৬ ডিচেম্বৰ