ৰঙিয়াৰ ৩নং ৱার্ডৰ বাসিন্দা মিৰাজুল ইছলাম আৰু ৰুমা নাজৰিনৰ সুপুত্র আৰিয়ান জিছান আহমেদে আমেৰিকাৰ মহাকাশ অনুসন্ধান সংস্থা নাছাৰ পৰা বিৰল স্বীকৃতি লাভ কৰিছে৷ মেঘালয়ৰ ইউএছটিএমৰ বিটেক (কম্পিউটাৰ বিজ্ঞান)ৰ প্রথম ষাণ্মাসিকৰ ছাত্র আৰিয়ানে ইণ্টাৰনেচনেল এষ্ট্র’নোমিকেল ছার্চ কোলাব’ৰেচন (IASC)ৰ অধীনত দুটা নতুন গ্রহাণু আৱিষ্কাৰ কৰি বিশ্বৰ দৃষ্টি আকর্ষণ কৰিবলৈ সক্ষম হৈছে৷
২০২৪ চনৰ ২৫ অক্টোবৰৰ পৰা ১৯ নৱেম্বৰৰ ভিতৰত অনুষ্ঠিত ‘IASC’ৰ আনুষ্ঠানিক গৱেষণা অভিযানৰ সময়ত আৰিয়ানে নাছাৰ সহযোগত হাৱাই বিশ্ববিদ্যালয়ৰ ইনষ্টিটিডট ফৰ এষ্ট্র’নোমিৰ দ্বাৰা পৰিচালিত Pan-STARRS (Panoramic Survey Telescope and Rapid Response System)ৰ পৰা প্রাপ্ত পর্যবেক্ষণমূলক তথ্য বিশ্লেষণ কৰিছিল৷ এই বিশ্লেষণৰ জৰিয়তে তেওঁ পূর্বতে ৰেকর্ড নোহোৱা দুটা মেইন বেল্ট গ্রহাণু সফলতাৰে চিনাক্ত কৰিছে৷ সদ্যহতে এই দুটা গ্রহাণুক ২০২৪ ভিই আৰু ২০২৪ ভিচি ২৩ নামেৰে নামকৰণ কৰা হৈছে৷
মেইন বেল্ট গ্রহাণু হৈছে মঙল আৰু বৃহস্পতি গ্রহৰ মাজত সূর্যক প্রদক্ষিণ কৰা বৃহৎ শৈলখণ্ড৷ এই অধ্যয়নে বিজ্ঞানীসকলক সৌৰজগতৰ আৰম্ভণিৰ বিষয়ে বুজিবলৈ সহায় কৰাৰ লগতে মহাকাশত থকা বস্তুৰ দীর্ঘম্যাদী অনুসৰণ সহজ কৰি তোলে৷ আৰিয়ানৰ এই আৱিষ্কাৰে ভাৰতীয় মহাকাশ গৱেষণাত নতুন মাইলৰ খুঁটি স্থাপন কৰিছে আৰু তেওঁ পোৱা স্বীকৃতিয়ে অসমৰ যুৱপ্রজন্মক প্রেৰণা যোগাব বুলি আশা কৰা হৈছে৷ IASCৰ অধীনত আৰিয়ানে চলোৱা গ্রহাণুৰ অনুসন্ধান আৰু গৱেষণালৈ নাছাৰ এই স্বীকৃতিয়ে তেওঁৰ প্রচেষ্টাক আৰু অধিক গুৰুত্বপূর্ণ কৰি তুলিছে৷ এই সফলতাই অসমৰ শিক্ষা আৰু বিজ্ঞান ক্ষেত্রত নতুন দিগন্ত মুকলি কৰিব বুলি আশা কৰা হৈছে৷
নিয়মীয়া বার্তা, ৰঙিয়া, ২১ ডিচেম্বৰ :