আইচিচি টি-২০ ৱৰ্ল্ড কাপ ২০২৬ত টীম ইণ্ডিয়াই নিজৰ দ্বিতীয় ছুপাৰ-৮ মেচত জিম্বাবোৱেক বৃহৎ ব্যৱধানত পৰাস্ত কৰি ছেমিফাইনেলৰ আশা অটুট ৰাখিছে। চেন্নাইত অনুষ্ঠিত এই মেচত ভাৰতীয় সকলো বেটছমেনৰ বিস্ফোৰক ইনিংছ দেখা গৈছিল। সেই শক্তিৰে টীম ইণ্ডিয়াই প্ৰতিযোগিতাখনৰ ইতিহাসত দ্বিতীয় সৰ্ববৃহৎ স্ক’ৰ সংগ্ৰহ কৰে। ভাৰতে ৪ উইকেট হেৰুৱাই ২৫৬ ৰান সংগ্ৰহ কৰে। প্ৰথম ইনিংছ চলাকালীন টীম ইণ্ডিয়াৰ নামত এক অভিনৱ বিশ্ব ৰেকৰ্ডো লিপিবদ্ধ হয়, যি এতিয়ালৈকে টি-২০ ৱৰ্ল্ড কাপত দেখা পোৱা হোৱা নাছিল।
জিম্বাবোৱেৰ বিৰুদ্ধে ভাৰতৰ ৬জন বেটছমেন বেটিং কৰিবলৈ নামিছিল আৰু সকলো খেলুৱৈয়ে ১৫০ৰ ওপৰৰ ষ্ট্ৰাইক ৰেটত ২০তকৈ অধিক ৰান সংগ্ৰহ কৰে। প্ৰতিযোগিতাখনৰ ইতিহাসত এইটো প্ৰথমবাৰৰ বাবে দেখা গ’ল যে এটা দলৰ ৬জন বেটছমেনে একে ইনিংছত ২০ৰ অধিক ৰান সংগ্ৰহ কৰাৰ লগতে ১৫০ৰ ওপৰৰ ষ্ট্ৰাইক ৰেট বজাই ৰাখিছে। ২০০৭ চনৰ পৰা আৰম্ভ হোৱা ICC Men’s T20 World Cupত পূৰ্বে এনে কৃতিত্ব কেতিয়াও হোৱা নাছিল।
টছ হাৰি প্ৰথমে বেটিং কৰিবলৈ নমা ভাৰতীয় দলৰ উদ্বোধনী যুটি অভিষেক শৰ্মা আৰু সঞ্জু ছেমছনে দ্ৰুত আৰম্ভণি দিয়ে। সঞ্জুৱে প্ৰথম অভাৰতেই ছিক্সাৰ মাৰি ভাৰতীয় ইনিংছৰ সূচনা কৰে। তেওঁ ১৫ বলত ২৪ ৰান কৰি আউট হয়, ষ্ট্ৰাইক ৰেট আছিল ১৬০।
তাৰ পিছত অভিষেক শৰ্মা আৰু ঈশান কিষাণে দ্বিতীয় উইকেটৰ বাবে ৭২ ৰানৰ উৎকৃষ্ট অংশীদাৰী গঢ়ে। ঈশানে ১৫৮.৩৩ ষ্ট্ৰাইক ৰেটত ৩৮ ৰান কৰে। আনহাতে, অভিষেকে ১৮৩.৩৩ ষ্ট্ৰাইক ৰেটত ৫৫ ৰানৰ ইনিংছ খেলি ৪টা চাৰি আৰু ৪টা ছিক্সাৰ মাৰে।
অধিনায়ক সূৰ্যকুমাৰ যাদৱেও ধুমুহাৰ ভংগীত বেটিং কৰি ১৩ বলত ৩৩ ৰান সংগ্ৰহ কৰে, তেওঁৰ ষ্ট্ৰাইক ৰেট আছিল ২৫৩। তেওঁ নিজৰ ইনিংছত ৩টা চাৰি আৰু ২টা ছিক্সাৰ মাৰে।
শেষৰ অভাৰত হাৰ্দিক পাণ্ডিয়া আৰু তিলক বাৰ্মাই জিম্বাবোৱেৰ বলাৰসকলক আক্ৰমণ কৰি দলক ২৫৬ ৰানৰ বিশাল স্ক’ৰত উপনীত কৰে। হাৰ্দিকে ২৩ বলত ২টা চাৰি আৰু ৪টা ছিক্সাৰৰ সহায়ত অপৰাজিত ৫০ ৰান সংগ্ৰহ কৰে (ষ্ট্ৰাইক ৰেট ২১৭.৩৯)। আনহাতে, তিলকে ১৬ বলত ৩টা চাৰি আৰু ৪টা ছিক্সাৰেৰে অপৰাজিত ৪৪ ৰান কৰে, তেওঁৰ ষ্ট্ৰাইক ৰেট আছিল ২৭৫।
ডিজিটেল ডেস্ক, ২৭ ফেব্ৰুৱাৰী