নিয়মীয়া বাৰ্তা, ১২ এপ্ৰিলঃ ৰঙিয়াত লকডাউনৰ সময়ত দৰিদ্ৰ পৰিয়ালৰ বাবে চৰকাৰে আগবঢ়োৱা সাহায্যৰ ধনৰ নামত ব্যাপক দুৰ্নীতিৰ অভিযোগ উত্থাপন হৈছে । ৰঙিয়া উন্নয়ন খণ্ডৰ অন্তৰ্গত বৰদল গাঁও পঞ্চায়তত দৰিদ্ৰ পৰিয়ালৰ বাবে আবণ্টিত এহেজাৰ টকীয়া সাহায্যৰ ধন চান কাঢ়ি খোৱাৰ অভিযোগক লৈ তীব্ৰ প্ৰতিক্ৰিয়াৰ সৃষ্টি হৈছে ।
লকডাউনৰ সময়ত ৰেচনকাৰ্ড নথকা, আৰ্থিকভাৱে দুৰ্বল পৰিয়ালসমূহক চৰকাৰৰ ফালৰ পৰা এহেজাৰ টকাকৈ আৰ্থিক সাহায্য আগবঢ়োৱা হৈছে । কিন্তু এই এহেজাৰ টকাৰ পৰা উক্ত পঞ্চায়তখনৰ এগৰাকী প্ৰতিনিধিয়ে এটা অংশ আত্মসাৎ কৰা বুলি অভিযোগত প্ৰকাশ । পঞ্চায়তখনৰ অন্তৰ্গত হীৰাগাটা গাঁৱত উক্ত চৰকাৰী সাহায্যৰ পৰা কোনো এটা পৰিয়ালক যদি পাঁচশ টকা দিছে, আন কোনো এটা পৰিয়ালক সাতশ টকা দিছে । এনেদৰে এক হাজাৰ টকাৰ চৰকাৰী অনুদানৰ পৰা ৩০০ ৰ পৰা ৫০০ টকা আত্মসাৎ কৰা বুলি হিতাধিকাৰী একাংশই অভিযোগ কৰে ।