নিয়মীয়া বাৰ্তা, ২৭ এপ্ৰিলঃ ভাৰতৰ বিশ্বকাপ বিজয়ী প্রথমগৰাকী অধিনায়ক কিংবদন্তি কপিল দেৱৰ নতুন ৰূপে শেহতীয়াকৈ ছ’চিয়েল মিডিয়াত ব্যাপক চর্চা লাভ কৰা দেখা গৈছে৷ লকডাউনৰ সময়ছোৱাত কিংবদন্তি অলৰাউণ্ডাৰগৰাকীৰ এই ব্যতিক্রমী ৰূপ প্রত্যক্ষ কৰি ভিভিয়ান ৰিচার্ডছৰ দৰে ৱেষ্ট ইণ্ডিজৰ একালৰ মহান বেটছমেনেও প্রতিক্রিয়া প্রকাশ কৰিছে৷
উল্লেখ্য যে দেশজোৰা লকডাউনৰ বাবে ঘৰতে আবদ্ধ হৈ থকা প্রাক্তন ক্রিকেটাৰগৰাকীয়ে কিছুদিন পূর্বে সম্পূর্ণৰূপে মুণ্ডন কৰা আৰু নতুন ষ্টাইলৰ দাড়িৰে কেইটিমান ফটো ছ’চিয়েল মিডিয়াত প্রকাশ কৰিছিল৷ ইয়াৰ পিছতে কপিলৰ এই ব্যতিক্রমী ৰূপ ইণ্টাৰনেটত ভাইৰেল হৈ পৰে৷ ইফালে এই নতুন ৰূপক লৈ কিংবদন্তিগৰাকীয়ে কয় যে তেওঁৰ শৈশৱৰ হিৰ’ ভিভিয়ান ৰিচার্ডছ আৰু ভাৰতৰ প্রাক্তন অধিনায়ক মহেন্দ্র সিং ধোনীৰ দ্বাৰা অনুপ্রাণিত হৈ তেওঁ এই ব্যতিক্রমী ৰূপ ধাৰণ কৰিছে৷