নিয়মীয়া বাৰ্তা ২৯ এপ্ৰিলঃ লকডাউনৰ পূর্বে চিকিৎসাৰ বাবে দিল্লীলৈ যোৱা ৰাজ্যৰ বোকাখাতৰ এটা দম্পতীসহ তিনিজন লোক ক’ৰোনাত আক্রান্ত হৈছে৷ প্রাপ্ত তথ্য অনুসৰি, বোকাখাতৰ মহমাইকী গাঁৱৰ অজিত শইকীয়া আৰু বন্তি শইকীয়া ক’ৰোনাত আক্রান্ত হৈছে৷ তেওঁলোকৰ সৈতে দিল্লীলৈ যোৱা আন এজন যুৱকো ক’ৰোনাত আক্রান্ত হৈছে বুলি জানিব পৰা গৈছে৷ দেশৰ ৰাজধানী চহৰ দিল্লীৰ ৰাজীৱ গান্ধী ছুপাৰ স্পেচিয়েলিটিছ হাস্পতালত চিকিৎসাৰ বাবে গৈছিল শইকীয়া দম্পতী৷ সম্প্রতি তেওঁলোক দিল্লীতেই চিকিৎসাধীন হৈ আছে৷ উল্লেখ্য যে দিল্লীত ন’ভেল ক’ৰোনা ভাইৰাছত আক্রান্ত লোকৰ সংখ্যা দিনকদিনে বৃদ্ধি পাই আহিছে৷ ইয়াৰ পূর্বে নিজামুদ্দিনৰ জামাতলৈ যোৱা অসমৰ কেইবাগৰাকী ব্যক্তিও দিল্লীতে ক’ভিড–১৯ ৰোগত আক্রান্ত হৈছিল৷ আজি পুনৰ শইকীয়া দম্পতী এই ৰোগত আক্রান্ত হোৱাৰ বাতৰিয়ে শংকিত কৰি তুলিছে ৰাজ্যবাসীক।