ইএছআই হাস্পতালত বিষ গেষ্ট্রিকৰ দৰব দিয়া হৈছিল দীপিকাক

নিয়মীয়া বার্তা, ১১ মেঃ ক’ভিড–১৯ত আক্রান্ত হৈ মহানগৰীৰ দীপিকা নাথ নামৰ এগৰাকী যুৱতীৰ মৃত্যুৰ পাছত সৃষ্টি হোৱা ৰহস্য অব্যাহত আছে৷ বিশেষকৈ ভ্রমণ বৃত্তান্ত নথকা দীপিকাৰ শৰীৰলৈ ক’ৰ পৰা এই মৰাত্মক ৰোগবিধৰ সংক্রমণ হ’ল, সেই প্রশ্ণৰ উত্তৰ এতিয়াও লাভ কৰা হোৱা নাই৷ সমান্তৰালভাৱে জ্বৰ–কাহ আৰু ভৰিৰ বিষত ভোগা কিশোৰীগৰাকী কেইবাবাৰো চিকিৎসকৰ কাষ চপাৰ পাছতো কিয় ৰোগ চিনাক্ত কৰিব পৰা নগ’ল, সেয়াও আন এক উদ্বেগৰ বিষয় হৈ পৰিছে৷ ইয়াক লৈ চর্চা অব্যাহত থকাৰ সময়তে উত্থাপন হৈছে কেতবোৰ গুৰুতৰ অভিযোগ৷

সম্প্রতি কোৱাৰেণ্টাইনত থকা দীপিকাৰ মাতৃয়ে প্রকাশ কৰিছে কেতবোৰ তথ্য৷ সংবাদ মাধ্যমৰ আগত ফোনযোগে প্রতিক্রিয়া প্রকাশ কৰি দীপিকাৰ মাতৃয়ে কয় যে বেলতলাৰ ই এছ আই চি হাস্পতালত দূৰৰ পৰাই সোধা–পোছা কৰি চিকিৎসকে যাবলৈ দিছিল দীপিকাক৷ আনকি চিকিৎসকে বেলেগ কর্মচাৰীৰ জৰিয়তে প্রেছক্রিপচন দি গৈছিল বুলি উল্লেখ কৰি দীপিকাৰ মাতৃয়ে কয়– ‘ৰোগীৰ স্বাস্থ্য পৰীক্ষা কৰি, টেষ্ট আদি সম্পন্ন হোৱাৰ পাছত সিদ্ধান্ত ল’ব লাগিছিল৷ কিন্তু কোনো ধৰণৰ টেষ্ট বা পৰীক্ষা কৰা নাই৷ দূৰৰ পৰাই সোধা–পোছা কৰি ফোন নম্বৰ দি আমাক যাবলৈ দিছিল৷ ফোন কৰাৰ পাছতহে ঔষধৰ প্রেছক্রিপচন দিয়ে৷’ উল্লেখ্য যে দীপিকা নাথক চিকিৎসকে বিষ উপশম হোৱা টেবলটে, গেষ্ট্রিকৰ টেবলেট খাবলৈ দিছিল৷ সম্প্রতি কোৱাৰেণ্টাইনত থকা মাতৃগৰাকীয়ে আৱেগিক হৈ এইবুলিও কয়– ‘মোৰ ছোৱালীক মই হেৰুৱালোঁ৷ কিন্তু আগলৈ যাতে কোনো পিতৃ–মাতৃয়ে সন্তানক হেৰুৱাব নালাগে, তাৰ ব্যৱস্থা কৰক চৰকাৰে৷’

ইপিনে, বেলতলাৰ ই এছ আই চি হাস্পতাললৈ অহাৰ সময়ত দীপিকাৰ গাত ক’ভিড–১৯ৰ কোনো উপসর্গ নাছিল বুলি দাবী কৰিছে হাস্পতালখনৰ জ্যেষ্ঠ চিকিৎসক এ কে শইকীয়াই৷ সংবাদ মাধ্যমৰ আগত চিকিৎসকগৰাকীয়ে কয় যে ই এছ আই চি হাস্পতাললৈ দীপিকা ভৰিৰ বিষৰ চিকিৎসাৰ বাবেহে আহিছিল৷ সেই সময়ত যুৱতীগৰাকীৰ শৰীৰত জ্বৰ নাছিল৷ চিকিৎসক শইকীয়াই লগতে কয়– ‘কালাপাহাৰ ই এছ আই চি হাস্পতালে ভৰিৰ বিষৰ বাবে যুৱতীগৰাকীক অর্থপেডিকছৰ চিকিৎসাৰ বাবে প্রেৰণ কৰিছিল৷ বিষৰ চিকিৎসাৰ বাবে তেওঁ বেলতলাৰ হাস্পতাললৈ আহিছিল৷ সেই সময়ত যুৱতীগৰাকীৰ শৰীৰত জ্বৰ নাছিল৷ জ্বৰ নথকাৰ বহু কাৰণ থাকে৷ কেতিয়াবা তেওঁলোকে পেৰাচিটামল খাই আহে৷ কেতিয়াবা ৰোগীয়ে লুকুৱাই ৰাখে যে তেওঁলোকে দীর্ঘদিন জ্বৰ–কাহত আক্রান্ত৷ যুৱতীগৰাকীৰ ৰেফাৰেল লেটাৰত কেৱল ভৰিৰ বিষৰ কথা আছিল৷

সেয়েহে চিকিৎসকে ভৰিৰ বিষৰ চিকিৎসা কৰিছে৷ হয়তো হাস্পতাললৈ অহাৰ সময়ত পেৰাচিটামল খাই অহা বাবে যুৱতীগৰাকীৰ জ্বৰ নাছিল৷ গতিকে সন্দেহজনকভাৱে সকলো ৰোগীক ক’ৰোনাৰ পৰীক্ষা কৰাটো সম্ভৱ নহয়৷ ক’ৰোনাৰ এটা মাত্র লক্ষণ–উপসর্গ থাকিলেও তেওঁৰ নিশ্চয় পৰীক্ষা কৰা হ’লহেঁতেন৷’ আনহাতে, ই এছ আই চি হাস্পতালৰ প্রৱেশদ্বাৰত থার্মেল স্ক্রীনিং কৰা হয় বুলি উল্লেখ কৰি তেওঁ কয় যে প্রৱেশদ্বাৰত জ্বৰ পৰীক্ষা কৰা হয়৷ তেওঁৰ জ্বৰ পৰীক্ষা কৰোঁতে স্বাভাৱিক আছিল৷ চিচি টিভিৰ ফুটেজ অনুসৰি তেওঁলোকে টিকট বনাইছে আৰু অর্থপেডিকছ বিভাগলৈ আহিছে৷ এটা কথা নিশ্চিত যে তেওঁৰ কোনো ক’ভিডৰ উপসর্গ নাছিল৷ ইতিমধ্যে ই এছ আই চি হাস্পতালৰ প্রশাসনিক স্বাস্থ্য বিষয়াই ৰাজ্য চৰকাৰলৈ এই সন্দর্ভত পত্র প্রেৰণ কৰিছে বুলি ডাঃ শইকীয়াই সদৰী কৰে৷ একে সময়তে যিহেতু হাস্পতালখনলৈ অহাৰ সময়ত দীপিকাৰ গাত কোনো লক্ষণ নাছিল, সেয়েহে চিকিৎসকক দোষী কৰাটো সমীচীন নহয় বুলিও তেওঁ মন্তব্য কৰে৷