নিয়মীয়া বাৰ্তা ১০ জুনঃ কেন্দ্রীয় চৰকাৰৰ কর্মচাৰী আৰু বিষয়াৰ বাবে কেন্দ্রই ক’ৰোনা ভাইৰাছৰ সংক্রমণ প্রতিৰোধৰ লক্ষ্যৰে নতুনকৈ ১৩ দফীয়া নির্দেশনা জাৰি কৰিছে৷ শেহতীয়াকৈ কেন্দ্রীয় চৰকাৰৰ বিভিন্ন বিভাগৰ কার্যালয়ত ক’ভিড–১৯ পজিটিভ ৰোগী ধৰা পৰাৰ পিছতে এই পদক্ষেপ লোৱা হৈছে৷ উক্ত নির্দেশনা অনুসৰি ক’ৰোনা ভাইৰাছৰ লক্ষণ নথকা বিষয়া–কর্মচাৰীকহে কার্যালয়ত প্রৱেশৰ অনুমতি দিয়া হ’ব৷ জ্বৰ–কাহত ভোগা বিষয়া–কর্মচাৰীক ঘৰতে থকাৰ পৰামর্শ দিয়া হৈছে৷ কণ্টেইনমেণ্ট জ’নত বাস কৰাসকলকো কার্যালয়লৈ নহাৰ বাবে নির্দেশ দিয়া হৈছে৷ কার্যালয়ত কেৱল ২০জন বিষয়া–কর্মচাৰীহে উপস্থিত থাকিব পাৰিব আৰু সেইমতে কার্যালয়ত উপস্থিত থকাৰ দিন ভাগ কৰি দিব লাগিব৷ আনসকলে ঘৰৰ পৰাই কার্যালয়ৰ দায়িত্ব পালন কৰিব লাগিব৷ অবৰ সচিব আৰু উপ–সচিবৰ কেবিন এটা হ’লে তেওঁলোকে এদিন এৰি এদিন কার্যালয়লৈ আহিব৷ এটা শাখাত দুজনহে বিষয়া উপস্থিত থাকিব৷ প্রয়োজন সাপেক্ষে বতাহ চলাচলৰ বাবে খিৰিকি খোলা ৰাখিব৷ মাস্ক নিপিন্ধা বিষয়া–কর্মচাৰীৰ বিৰুদ্ধে অনুশাসনমূলক ব্যৱস্থা গ্রহণ কৰা হ’ব৷ ব্যৱহূত মাস্ক আৰু গ্ল’ভছ হালধীয়া ৰঙৰ বায়’ মেডিকেল ৱেষ্ট বিনত পেলাই দিব লাগিব৷ ভিডিঅ কনফাৰেন্সসমূহত নিজৰ নিজৰ কোঠালিৰ পৰা অংশ ল’ব লাগিব৷ আনহাতে যিমান দূৰ সম্ভৱ মুখামুখি বৈঠক, আলোচনা এৰাই চলাটো জৰুৰী৷ সম্ভৱ হ’লে ইণ্টাৰকমত বিভিন্ন বিষয় আলোচনা কৰিবলৈ নির্দেশনাৱলীত পৰামর্শ দিছে৷ তদুপৰি প্রতি আধা ঘণ্টাৰ মূৰত হাত ধুবলৈ আৰু নির্দিষ্ট অঞ্চলত ছেনিটাইজিং ডিছপেনছাৰ স্থাপন কৰাৰো পৰামর্শ দিয়া হৈছে৷ তদুপৰি সঘন হাতেৰে স্পর্শ কৰা স্থান যেন ইলেক্ট্রিক ছুইছ, ড’ৰ ন’ব, লিফটৰ ছুইছ, ৰেলিং আদি প্রতি এঘণ্টাৰ মূৰত ১ শতাংশ ছ’ডিয়াম হাইপ’ক্ল’ৰাইটেৰে পৰিষ্কাৰ কৰিব লাগিব৷ কী ব’ড, মাউছ, ফোন, এ চি ৰিম’ট আদিও ইথানল মিহলি ডিছইনফেক্টৰেৰে পৰিষ্কাৰ কৰিব লাগিব৷ বহা বা খোজকঢ়াৰ সময়ত কমেও ১ মিটাৰৰ দূৰত্ব ৰক্ষা কৰাৰ পৰামর্শ দিয়া হৈছে এই নির্দেশাৱলীত৷