নিয়মীয়া বাৰ্তা, ১৪ জুনঃ সুদীৰ্ঘ ১০০ দিনৰ পিছত ইটালীত ঘূৰি আহিল ফুটবলৰ বাতাৱৰণ৷ শুকুৰবাৰে নিশা টুৰিনত জুভেণ্টাছ আৰু এচি মিলানৰ মাজত অনুষ্ঠিত ইটালিয়ান কাপৰ ছেমিফাইনেলৰ দ্বিতীয় লেগৰ মেচখনৰ যোগেদি ইটালীত পুনৰ আৰম্ভ হয় ফুটবল৷
তীব্র উত্তেজনাপূর্ণ মেচখন গ’লশূন্যভাৱে সমাপ্ত হয় যদিও ক্রিষ্টিয়ানো ৰ’নাল্ডোসহিতে তাৰকা খেলুৱৈৰে সমৃদ্ধ জুভেণ্টাছে প্রতিযোগিতাখনৰ ফাইনেলত স্থান সুৰক্ষিত কৰিবলৈ সক্ষম হয়৷ মন কৰিবলগীয়া যে দুয়ো দলৰ মাজত ফেব্রুৱাৰীত অনুষ্ঠিত ছেমিফাইনেলৰ প্রথম লেগৰ মেচখনো ১–১ গ’লত অমীমাংসিত হৈছিল৷
যোৱানিশাৰ উত্তেজনাপূর্ণ মেচখনত জুভেণ্টাছ দলটোৰ তাৰকা খেলুৱৈ ৰ’নাল্ডোৱে পেনাল্টী কিকত ব্যর্থ হোৱাত মেচখনত দলটোৱে জয়ৰ মুখ দেখিবলৈ সক্ষম নহ’ল৷ খেলখনৰ ১৬ মিনিটত এচি মিলানৰ আন্দ্রে কণ্টিৰ কিলাকুটিত বল লগাত ৰেফাৰীয়ে পেনাল্টীৰ নির্দেশ দিয়ে যদিও জুভেণ্টাছৰ ৰ’নাল্ডোৱে এই পেনাল্টীটো কার্যকৰী কৰাত ব্যর্থ হয়৷
প্রতিযোগিতাখনৰ ফাইনেল মেচখন অহা বুধবাৰে ৰোমত অনুষ্ঠিত হ’ব আৰু এই খিতাপ যুঁজৰ মেচখনত জুভেণ্টাছৰ প্রতিদ্বন্দ্বী হ’ব নাপলী আৰু ইণ্টাৰ মিলানৰ মাজত হ’বলগীয়া দ্বিতীয় ছেমি ফাইনেলৰ দ্বিতীয় লেগৰ মেচৰ বিজয়ী দলটোৰে৷