নিয়মীয়া বাৰ্তা, ১৪ জুনঃ ক’ৰোনা ভাইৰাছৰ সংক্রমণ প্রতিৰোধ কৰাৰ লক্ষ্যৰে ঘোষণা কৰা লকডাউনৰ সমান্তৰালকৈ অর্থনৈতিক কার্যকলাপ চলাই নিয়াৰো সিদ্ধান্ত গ্রহণ কৰিছে কেন্দ্র–ৰাজ্য চৰকাৰে৷ যাৰ বাবে লকডাউনৰ নীতি–নিয়মত কিছু শিথিলতা প্রদান কৰা হৈছে৷ নির্দিষ্ট নিয়মাৱলীৰ মাজেৰে স্বাস্থ্য বিধি অনুসৰণ কৰি অর্থনৈতিক কাম–কাজ চলাই নিয়াৰ অনুমতি দিয়া হৈছে৷
ৰাজ্য–কেন্দ্র উভয় চৰকাৰে প্রদান কৰা এই শিথিলতাৰেই যেন সুযোগ গ্রহণ কৰিছে একাংশ লোকে৷ ক’ৰোনাৰ ‘হটবেড’ত পৰিণত হোৱা গুৱাহাটী মহানগৰীত পদে পদে ভংগ কৰা হৈছে লকডাউনৰ নীতি–নিয়ম৷ পুৱাৰে পৰা নিশালৈ মহানগৰীৰ ব্যস্ত জীৱনত ক’তো লকডাউনৰ সামান্যতমো প্রভাৱ পৰিলক্ষিত হোৱা নাই৷ ক’ৰোনাৰ আটাইতকৈ ভয়াৱহ পর্যায় সামাজিক সংক্রমণৰ দিশে গতি কৰা মহানগৰীখনত একাংশ লোক এতিয়াও সজাগ–সচেতন আৰু সাৱধান হোৱা নাই৷
হাট–বজাৰ, চৰকাৰী–বেচৰকাৰী কার্যালয়, ব্যৱসায়িক প্রতিষ্ঠানকে ধৰি বিভিন্ন ক্ষেত্রত বহু লোকে অনুসৰণ কৰা নাই স্বাস্থ্য বিধি৷ ঘৰৰ পৰা বাহিৰলৈ ওলোৱাৰ লগে লগে মাস্ক পৰিধান কৰাটো বাধ্যতামূলক কৰা হৈছে৷ সকলো স্থানতে সামাজিক দূৰত্বৰ নীতি পালন কৰিবলৈ কঠোৰ নির্দেশ দিয়া হৈছে৷ কিন্তু হাটে–বজাৰে হাজাৰ হাজাৰ লোকে মাস্ক পৰিধান নকৰাকৈয়ে ঘূৰি ফুৰা পৰিলক্ষিত হৈছে৷ বহুসংখ্যকে আকৌ নামতহে মাস্কখন লৈ ঘূৰি ফুৰা দেখা যায়৷ মাস্কখনেৰে নাম–মুখ ঢ়াকি ৰখাৰ পৰিৱর্তে কাণতহে ওলোৱাই ৰাখে৷
আনহাতে, সামাজিক দূৰত্বৰ নীতি যেন একপ্রকাৰ ধোঁৱাচাঙত তুলি থোৱা হৈছে৷ ৰাজপথ, বজাৰ–সমাৰ সকলোতে ব্যাপক জনসমাগ ঘটিছে৷ মহানগৰীৰ গণেশগুৰি, চানমাৰি, নুনমাটি, মালিগাঁৱকে ধৰি বিভিন্ন অঞ্চলত পদপথতে বহিছে বজাৰ৷ শাক–পাচলি, মাছ–মাংস, কাপোৰ–কানিকে ধৰি বিভিন্ন সামগ্রীৰ বজাৰত পুৱাৰে পৰা নিশালৈ অত্যধিক ভিৰ পৰিলক্ষিত হৈ আহিছে৷
উল্লেখ্য যে কেন্দ্রীয় চৰকাৰে আনলক ১.০ৰ অধীনত নতুনকৈ ধর্মীয় উপাসনাস্থলী, শ্বপিং মল আদি খুলিবলৈ অনুমতি প্রদান কৰিছে৷ ইয়াৰ পূর্বৰ লকডাউনৰ সময়ত কার্যালয় আৰু ব্যৱসায়িক প্রতিষ্ঠানসমূহ খোলাৰ অনুমতি প্রদান কৰিছিল৷ শিথিলতা প্রদান কৰিলেও দেশজুৰি অহা ৩০ জুনলৈ লকডাউন অব্যাহত থাকিব বুলি কেন্দ্রীয় চৰকাৰে ঘোষণা কৰিছে৷ কিন্তু লকডাউনৰ সময়ত পালন কৰিবলগীয়া নীতি–নিয়ম যেন পাহৰি গৈছে সর্বসাধাৰণে৷ যাৰ বাবে মহানগৰীত সংক্রমণে ভয়াৱহ ৰূপ লোৱাৰ আশংকা কৰা হৈছে৷
ইপিনে, লকডাউন শিথিল হোৱাৰ লগে লগে যেন নিয়ম ভংগকাৰীৰ বিৰুদ্ধে নৰম হৈ পৰিছে আৰক্ষী–প্রশাসনে৷ প্রথম–দ্বিতীয় পর্যায়ৰ লকডাউনৰ সময়ত ঘৰৰ পৰা বাহিৰলৈ ওলোৱা লোকক আঁঠুকঢ়াই শাস্তি প্রদান কৰা আৰক্ষীয়েও নির্লিপ্ত ভূমিকা পালন কৰা দেখা গৈছে৷ সামাজিক দূৰত্ব নমনা, মাস্ক পৰিধান নকৰা ব্যক্তিৰ বিৰুদ্ধে মহানগৰীত আৰক্ষীয়ে বর্তমানপর্যন্ত ব্যৱস্থা নোলোৱাৰ অভিযোগ উত্থাপন হৈছে৷ আনকি নিশা ৯ বজাৰ পাছত সান্ধ্য আইন বলৱৎ হয় যদিও ৰাজপথত গাড়ী–মটৰৰ ভিৰ অব্যাহত আছে৷ নিশাপর্যন্ত ৰাজপথত চলি থাকে বাহন৷ ইয়াৰ বিৰুদ্ধে ব্যৱস্থা গ্রহণ কৰিবলৈ মহানগৰীত নাই আৰক্ষীৰ পর্যাপ্ত তালাচী ব্যৱস্থা৷