নিয়মীয়া বাৰ্তা, ২৫ জুনঃ উইজডেন ইণ্ডিয়াৰ এক সমীক্ষাত ক্রিকেটৰ ভগৱানখ্যাত শচীন তেণ্ডুলকাৰক চেৰ পেলাই শীর্ষস্থান অধিকাৰ কৰিছে দ্য ৱাল খ্যাত ৰাহুল দ্রাবিড়ে৷ ভাৰতৰ সর্বকালৰ সর্বশ্রেষ্ঠ টেষ্ট বেটছমেনক লৈ প্রস্তুত কৰা সমীক্ষাটোত দ্রাবিড়ে ৫২ শতাংশ ভোট লাভ কৰি শীর্ষস্থান অধিকাৰ কৰাৰ বিপৰীতে তেণ্ডুলকাৰে দ্বিতীয় আৰু সুনীল গাভাস্কাৰে তৃতীয় স্থান অধিকাৰ কৰিবলৈ সক্ষম হৈছে৷
উল্লেখ্য যে উইজডেন ইণ্ডিয়াই ১৬গৰাকী ভাৰতীয় বেটছমেনৰ মাজত ফেচবুকৰ মাধ্যমেৰে সমীক্ষাটো চলাইছিল৷ আজি প্রকাশ পোৱা ফলাফলত দ্রাবিড়ে প্রথম, তেণ্ডুলকাৰে দ্বিতীয়, সুনীল গাভাস্কাৰে তৃতীয় স্থান অধিকাৰ কৰাৰ বিপৰীতে চতুর্থ স্থানত থাকে টীম ইণ্ডিয়াৰ অধিনায়ক বিৰাট কোহলি৷
মন কৰিবলগীয়া যে ভাৰতৰ প্রাক্তন তাৰকা তেণ্ডুলকাৰ আৰু দ্রাবিড়ক বিশ্ব ক্রিকেটৰ অন্যতম শ্রেষ্ঠ টেষ্ট বেটছমেন হিচাপে গণ্য কৰা হয়৷ টেষ্ট আৰু এদিনীয়াত দুয়োগৰাকী ক্রিকেটাৰে ১০ হাজাৰৰো অধিক ৰান সংগ্রহ কৰিবলৈ সক্ষম হৈছে৷