নিয়মীয়া বাৰ্তা, ২৬ জুনঃ ৰাজ্যত দ্রুতগতিত বৃদ্ধি পোৱা ক’ৰোনা সংক্রমণক লৈ জটিল হৈ পৰিছে ৰাজ্যৰ পৰিস্থিতি৷ বিশেষকৈ ভয়াৱহভাৱে ক’ৰোনা আক্রান্তৰ সংখ্যা বৃদ্ধিৰ ফলত গুৱাহাটী মহানগৰী সামাজিক সংক্রমণৰ দিশে গতি কৰাৰ আশংকাক লৈ স্বাস্থ্য বিভাগৰ লগতে ৰাজ্য চৰকাৰো উদ্বিগ্ন হৈ পৰিছে৷
যাৰ বাবে দেওবাৰৰ মাজনিশাৰ পৰা গুৱাহাটী মহানগৰীত ১৪ দিনৰ বাবে লকডাউন ঘোষণা কৰে স্বাস্থ্যমন্ত্ৰী ড০ হিমন্ত বিশ্ব শৰ্মাই । ১২ জুলাই লৈকে এই লকডাউন কাৰ্যকৰী হ’ব ।
উল্লেখ্য যে বৃহস্পতিবাৰৰ দিনটোত ৰাজ্যত নতুনকৈ ক’ৰোনাত আক্রান্ত হৈছে ২৭৬জন৷ নিশা ১১.৪০ বজাত স্বাস্থ্যমন্ত্রী ড০ হিমন্ত বিশ্ব শর্মাই টুইটযোগে এই তথ্য সদৰী কৰিছে৷ বৃহস্পতিবাৰে নতুনকৈ আক্রান্ত হোৱা ২৭৬কে ধৰি এই সংখ্যাৰে মুঠ আক্রান্তৰ সংখ্যা ৬,৬৪৬লৈ বৃদ্ধি পালে৷ আনহাতে, চিকিৎসালয়ৰ পৰা সুস্থ হৈ ৰিলিজ পাইছে ৪,০৩৩জনে৷ এতিয়াও চিকিৎসাধীন হৈ আছে ২,৬০১জন৷
