নিয়মীয়া বাৰ্তা ৯জুলাইঃ মৰিগাঁও চহৰৰ লঠাবড়িত ইঞ্জিনিয়াৰিঙৰ এজন ছাত্ৰৰ ৰহস্য জনক মৃত্যুয়ে মৰিগাঁও চহৰত তীব্ৰ চাঞ্চল্যৰ সৃষ্টি কৰিছে ।মৃত ছাত্ৰ জন হৈছে লাহৰীঘাটৰ তিনিচুকীয়াৰ পৰা আহি মৰিগাঁও চহৰৰ লঠাবড়িত এটা ভাড়াঘৰত পৰিয়াল সহ বসবাস কৰা তথা তেজপুৰৰ এখন বেচৰকাৰী ইঞ্জিনিয়াৰিঙৰ ছাত্ৰ অনুৰাগ ডেকা ।ছাত্ৰ জনৰ খুৰাক সোনাৰাম ডেকাই মৰিগাঁও থানাত দাখিল কৰা এজাহাৰত উল্লেখ কৰে যে কালি চাৰিজনকৈ বন্ধুৰ লগত দিনটো কটোৱাৰ অন্তত নিশা ৮.৩০ মান বজাত এএছ ০১ বিএফ ০১০৫ নম্বৰৰ এখন বগা ৰঙৰ ৱাগনাৰ গাড়ীৰে অচিনাক্ত বন্ধু কেইজনে অনুৰাগক ঘৰত নমাই থৈ যায় ।কিন্তু নিশা ছাত্ৰ জনৰ স্বাস্থ্যৰ অৱনতি হোৱাত তেওঁক মৰিগাঁও অসামৰিক চিকিৎসালয়ত ভৰ্তি কৰোৱা হয় যদিও অনুৰাগৰ নিশাই মৃত্যু হয় ।পৰিয়ালৰ লোকে এয়া এক পৰিকল্পিত হত্যা কাণ্ড বুলি অভিযোগ কৰি আৰক্ষীক ঘটনাটোৰ তদন্ত কৰি দোষীক কঠোৰ শাস্তি প্ৰদানৰ দাবী জনাইছে।