কাৰাবন্দী অখিল গগৈসহ সতীৰ্থৰ আশু আৰোগ্য কামনাৰে ৩৪০ বছৰীয়া টিপাম ডাঙৰীয়া থানত ১০১ গছি বন্তি প্ৰজ্বলন দুলীয়াজান আটাছুৰ
নিয়মীয়া বাৰ্তা, ৯ জুলাই : ৩৪০ বছৰীয়া টিপাম ডাঙৰীয়া থানত ১০১ গছি বন্তি প্ৰজ্বলন কৰি কাৰাবন্দী অখিল গগৈ, মানস কোঁৱৰ, ধৈৰ্য্য কোঁৱৰ, বিতু সোণোৱালৰ আশু আৰোগ্য কামনাৰে সেৱা ল’লে দুলীয়াজান আঞ্চলিক টাই আহোম ছাত্ৰ সন্হাই ।
দুলীয়াজানৰ সমীপৱৰ্তী ১ নং চপাতলী গাওঁত অৱস্হিত এই পৌৰাণিক থানখনত সেৱা লৈ শাসকীয় চৰকাৰখনৰ পতনৰ কামনা কৰে সংগঠনটোৰ সদস্যসকলে । আনহাতে অতি শীঘ্ৰে কাৰাবন্দী অখিল গগৈৰ লগতে সমূহ সতীৰ্থক মুকলি কৰি দিবলৈ চৰকাৰক দাবী জনাইছে আটাছু দুলীয়াজান আঞ্চলিকে ।
অন্যথা গণতান্ত্ৰিক পদ্ধতিৰে বিজেপি বিৰোধী প্ৰতিবাদী কাৰ্যসূচী গ্ৰহণ কৰিবলৈ ককাঁলত টঙালী বান্ধি লোৱাৰ হুংকাৰ জুৰিছে সংগঠনটোৰ আঞ্চলিকৰ সাঃ সম্পাদক ৰূপম গগৈয়ে ।