নিয়মীয়া বাৰ্তা, ১১ জুলাইঃ সদৌ তাই আহোম ছাত্ৰ সন্থাৰ প্ৰাক্তন সভাপতি তথা মুখ্য উপদেষ্টা অশ্বিনী কুমাৰ চেতিয়াৰ বিয়োগত শোক প্ৰকাশ কৰি তেখেতৰ আত্মাৰ সদ্গতিৰ কামনাৰে মৌন প্ৰাৰ্থনা লগতে আজি এক শ্ৰদ্ধাঞ্জলি অনুষ্ঠান আয়োজন কৰে সদৌ তাই আহোম ছাত্ৰ সন্হা দুলীয়াজান আঞ্চলিকে । আজি বিয়লি দুলীয়াজান পুৰণি বাছ আস্হানত অনুষ্ঠিত শ্ৰদ্ধাঞ্জলী অনুষ্ঠানত আহোম সংগ্ৰামী নেতাজনৰ প্ৰতিচ্ছবিৰ সন্মুখত ধূপ-বন্তি প্ৰজ্বলন আৰু মাল্যাপৰ্ণ কৰি তেখেতলৈ গভীৰ শ্ৰদ্ধা জ্ঞাপন কৰাৰ লগতে তেখেতৰ কৰ্মৰাজিক সোঁৱৰণ কৰে উপস্থিত বিভিন্ন দল-সংগঠনে ।
উল্লেখযোগ্য যে তাই আহোম জনগোষ্ঠীৰ সৰ্বাংগীন উন্নয়ন আৰু বিকাশৰ অৰ্থে নিঃস্বাৰ্থভাৱে সেৱা কৰি অহা সদৌ তাই আহোম ছাত্ৰ সন্থা আৰু ছয় জনগোষ্ঠীৰ ঐক্য মঞ্চৰ সমন্বয়কৰ গুৰু দায়িত্ব লৈ জাতীয় সংগ্ৰামখনক এক নতুন মাত্ৰা প্ৰদান কৰিছিল অশ্বিনী কুমাৰ চেতীয়াই । ইয়াৰোপৰি অসমৰ জাতীয় জীৱনৰ প্ৰতিটো সমস্যাৰ বিপৰীতে তেখেতৰ বলিষ্ঠ কন্ঠ আছিল । এই সংগ্ৰামী নেতাগৰাকীলৈ শ্ৰদ্ধাঞ্জলি জনাই দুলীয়াজান আঞ্চলিক তাই আহোম ছাত্ৰ সন্থাৰ লগতে দুলীয়াজান আঞ্চলিক মটক যুৱ ছাত্ৰ সন্মিলন, দুলীয়াজান আঞ্চলিক অসম চাহ জনজাতি ছাত্ৰ সন্থা, দুলীয়াজান প্ৰেছ ক্লাব, সন্মিলিত সাংবাদিক মঞ্চ, দুলীয়াজান আঞ্চলিক টাই আহোম যুৱ পৰিষদ, দুৰ্নীতি বিৰোধী যুৱ শক্তি, সংখ্যালঘু ছাত্ৰ ইউনিয়ন প্ৰমুখ্যে কেইবাটাও দল সংগঠন আৰু জ্যেষ্ঠ নাগৰিকসকলে ।