নিয়মীয়া বাৰ্তা, ১৩ জুলাইঃ কৃষক মুক্তি সংগ্ৰাম সমিতিৰ নেতা অখিল গগৈ, ধৈৰ্য কোঁৱৰ, মানস কোঁৱৰ আৰু বিতু সোণোৱালৰ সুস্বাস্থ্য আৰু মুক্তিৰ দাবীত আজি সন্ধিয়া বৰহোলাৰ বি অ চি লাইনত কৃষক মুক্তি সদস্যসকলে বন্তি প্ৰজলন কাৰ্যসূচী ৰূপায়ন কৰে। বৰহোলাৰ বি অ চি লাইনৰ প্ৰায় এশঘৰ লোকৰ পদূলিত একোগছিকৈ বন্তি জ্বলাই জননেতা অখিল গগৈ, ধৈৰ্য কোঁৱৰ, মানস কোঁৱৰ আৰু বিতু সোণোৱালৰ সুস্বাস্থ্য বাবে প্ৰাৰ্থনা কৰে ।
লগতে প্ৰতিবাদী ৰাইজে সৰ্বানন্দ সোণোৱাল চৰকাৰক অখিল গগৈ ধৰি সকলো কভিড আক্ৰান্ত কাৰাবাস বন্দীক শীঘ্ৰে মুক্তি দিবলৈ দাবী জনায়। কৃষক মুক্তি সংগ্ৰাম সমিতিৰ বৰহোলা আঞ্চলিকৰ সভাপতি আব্দুল ৰহিম, সম্পাদক নিতুল শইকীয়া, ৰাজীৱ চুতীয়া, উপদেষ্টা পোনা শইকীয়াকে ধৰি শতাধিক কৰ্মীয়ে অংশগ্ৰহণ কৰে।