নিয়মীয়া বাৰ্তা, ১৪ জুলাইঃ সদ্যপ্রয়াত প্রাক্তন আছু নেতা তথা বিজেপি নেতা অশ্বিনী চেতিয়াৰ দুই ভাতৃ মুকুল চেতিয়া আৰু প্রশান্ত চেতিয়া ক’ৰোনাত আক্রান্ত হোৱা ঘটনাই শিৱসাগৰত তীব্র শংকা সৃষ্টি কৰিছে৷ কিয়নো অশ্বিনী চেতিয়াৰ মৃত্যুৰ পাছতেই মৃতদেহৰ লগত বন্ধুবর্গ আৰু দুই ভাতৃ গুৱাহাটীৰ পৰা শিৱসাগৰত উপস্থিত হৈছিল৷ পৰৱর্তী সময়ত হাঁহচৰা নপাম চেতিয়া গাঁৱত অশ্বিনী চেতিয়াৰ শেষকৃত্য সম্পন্ন কৰা হৈছিল৷
য’ত উপস্থিত আছিল দুই সাংসদ তপন গগৈ, কামাখ্যাপ্রসাদ তাছা, বিধায়ক কুশল দুৱৰী, ৰাজ্যিক মন্ত্রী যোগেন মহন, জিলা উপায়ুক্ত লক্ষীনন্দন গগৈ আৰু আৰক্ষী অধীক্ষক অমিতাভ সিনহাসহ কেইবাজনো লোক৷ ৰাজনৈতিক নেতা আৰু প্রশাসনৰ লোক উপস্থিত থকা শেষকৃত্য সম্পূর্ণৰ পাছতেই অশ্বিনী চেতিয়াৰ দুই ভাতৃ ক’ভিড আক্রান্ত হোৱা ঘটনাই উপস্থিত থকাসকলৰ শংকা বৃদ্ধি কৰিছে৷ ইফালে জিলাখনত ক’ৰোনা আক্রান্তৰ সংখ্যা ৮৪লৈ বৃদ্ধি হৈছে৷