নিয়মীয়া বাৰ্তা, ১৯ জুলাইঃ ক’ৰোনা মহামাৰীয়ে ৰাজ্যলৈ নমাই অনা দুর্যোগক লৈ স্বাস্থ্য বিভাগ উদ্বিগ্ণ হৈ থকাৰ মাজতেই শেহতীয়াকৈ ক’ৰোনাত আক্রান্ত হৈ মৃত্যু হোৱা লোকৰ সংখ্যাও বৃদ্ধি পাবলৈ লৈছে৷ এনে এক জটিল পৰিস্থিতি তথা সংকটৰ মাজতে সৃষ্টি হৈছে এক আশাৰ ৰেঙনি৷ ৰাজ্যবাসীক ক’ৰোনাৰ সংক্রমণে আতংকিত কৰি ৰখাৰ সময়তে গুৱাহাটী চিকিৎসা মহাবিদ্যালয় হাস্পতালত (জি এম চি এইচ) ১০গৰাকী ক’ভিড–১৯ পজিটিভ মাতৃয়ে জন্ম দিলে ৪টি কন্যা শিশু আৰু ৬টি পুত্র শিশুক৷
উল্লেখ্য যে ক’ৰোনা সংক্রমণৰ পৰিস্থিতিৰ মাজতে জি এম চি এইচত আক্রান্ত ১০গৰাকী মাতৃয়ে একোটিকৈ সুস্থ–সবল শিশু জন্ম দিয়া বিষয়টোৱে স্বাভাৱিকতে স্বাস্থ্যকর্মীৰ লগতে সাধাৰণ লোকৰ মাজতো আশাৰ সঞ্চাৰ সৃষ্টি কৰিছে৷ মাতৃকেইগৰাকীক চিজাৰিয়ান কৰি সফলতাৰে শিশুকেইটিক জন্ম দিয়াৰ সৈতে জড়িত চিকিৎসক তথা নার্ছসকলৰ মুখতো হাঁহি বিৰিঙাই তুলিছে৷ জি এম চি এইচৰ অধীক্ষক অভিজিৎ শর্মাই প্রকাশ কৰা মতে, জন্মলাভ কৰা প্রতিটো শিশুৱে সুস্থ আৰু সবল হৈ আছে৷
ইফালে নিৰাশাৰ মাজতো অহা এই ইতিবাচক খবৰক লৈ স্বাস্থ্যমন্ত্রী ড০ হিমন্ত বিশ্ব শর্মাই টুইটৰ জৰিয়তে মাতৃকেইগৰাকীৰ লগতে জি এম চি এইচৰ চিকিৎসকৰ দলটোকো শুভেচ্ছা জনাইছে৷ টুইটত স্বাস্থ্যমন্ত্রীগৰাকীয়্ এইবুলি উল্লেখ কৰিছে– প্রতিকূল পৰিস্থিতিৰ মাজতো আমি কেতিয়াবা হাঁহিৰব বাবে সুযোগ লাভ কৰোঁ৷ এনে আনন্দৰ মুহূর্ত একেৰাহে দ্বিতীয় দিনাৰ বাবে আমাৰ মাজলৈ আহিছে৷ উল্লেখ্য যে শেহতীয়াকৈ জি এম চি এইচৰ পৰা ক’ৰোনামুক্ত হৈ ঘৰলৈ উভতিছে জীৱিনী দেৱী বেইদ নামৰ ৯৩ বছৰীয়া আৰু অণিমা বড়ো নামৰ ৮০ বছৰীয়া মহিলা দুগৰাকী৷ স্বাস্থ্য বিভাগৰ লগতে স্বাস্থ্যকর্মীসকলকো উৎসাহ যোগোৱা এই খবৰৰ পাছত আজি ক’ৰোনা আক্রান্ত ১০গৰাকী মাতৃয়ে একোটিকৈ শিশু জন্ম দিয়া ঘটনাই স্বাভাৱিকতে জটিল পৰিস্থিতিৰ মাজতো সকলোৰে মাজত হাঁহিৰ পৰিৱেশ সৃষ্টি কৰিছে