নিয়মীয়া বাৰ্তা ২৫ জুলাইঃ মোদী ২.০ চৰকাৰৰ সাফল্যৰ খতিয়ান হিচাপে ঐতিহাসিক সিদ্ধান্ত সংবিধানৰ অনুচ্ছেদ ৩৭০ৰ বিলুপ্তি আৰু তিনি তালাক আইন বলৱতৰ বার্ষিকী দেশজুৰি পালন কৰিব বিজেপিয়ে৷ বিজেপিৰ প্রতিখন ৰাজ্যই অহা ২৮ জুলাইৰ পৰা তিনি আগষ্টলৈকে এই বার্ষিকী পালন কৰিব৷ বিজেপিৰ ৰাষ্ট্রীয় সাধাৰণ সম্পাদক অৰুণ সিঙে পত্রযোগে প্রতিখন ৰাজ্যক ইতিমধ্যে এই কার্যসূচী পালন কৰিবলৈ নির্দেশ দিছে৷ ৰাষ্ট্রীয় সম্পাদক সিঙে প্রকাশ কৰা অনুসৰি ৰাষ্ট্রীয় পর্যায়তো এই লৈ ভার্চুৱেল ৰেলী হ’ব৷ উল্লেখ্য যে বিগত বর্ষৰ আগষ্ট মাহত বিজেপি নেতৃত্বাধীন কেন্দ্রীয় চৰকাৰে সংবিধানৰ অনুচ্ছেদ ৩৭০ৰ বিলুপ্তি ঘটাই জম্মু–কাশ্মীৰৰ বিশেষ মর্যাদা কর্তন কৰি জম্মু–কাশ্মীৰ আৰু লাডাখ হিচাপে দুটা কেন্দ্রীয়শাসিত অঞ্চল ঘোষণা কৰিছিল৷ তেনেদৰে মুছলিম মহিলাৰ বিবাহ সুৰক্ষাক লৈ আইন বলৱৎ কৰি তিনি তালাক নিষিদ্ধ কৰিছিল৷