নিয়মীয়া বাৰ্তা, ৩১ জুলাইঃ পিতৃত্বৰ গৌৰৱ অর্জন কৰিলে টীম ইণ্ডিয়াৰ উদীয়মান অলৰাউণ্ডাৰ হার্দিক পাণ্ডিয়াই৷ ২৬ বছৰীয়া ক্রিকেটাৰগৰাকীয়ে আজি ছ’চিয়েল মিডিয়াত প্রকাশ কৰে যে তেওঁ আৰু তেওঁৰ পত্নী নাটাছা ষ্টানক’ভিচৰ জীৱনলৈ আহিছে এটি ল’ৰা সন্তান৷ টুইটাৰত তেওঁ সু–সংবাদ সদৰী কৰি ল’ৰা সন্তানটোৰ এখন হাতৰ ছবি শ্বেয়াৰ কৰে৷
উল্লেখ্য যে সংগোপনে বিবাহপাশত আবদ্ধ হোৱা ক্রিকেটাৰগৰাকীয়ে বিগত মে’ মাহত ঘোষণা কৰিছিল যে তেওঁ আৰু তেওঁৰ পত্নী নাটাছাই সন্তানক আদৰিবলৈ আগ্রহেৰে অপেক্ষা কৰিছে৷ ইফালে, ল’ৰা সন্তানৰ পিতৃ হোৱা বুলি হার্দিকে ছ’চিয়েল মিডিয়াত প্রকাশ কৰাৰ পিছতে টীম ইণ্ডিয়াৰ অধিনায়ক বিৰাট কোহলি আৰু প্রশিক্ষক ৰবি শাস্ত্রীকে ধৰি সতীর্থসকলে হার্দিকক শুভেচ্ছা জনাইছে৷ উল্লেখ্য যে চলিত বর্ষৰ প্রথমটো দিনতে হার্দিকে নাটাছাৰ সৈতে বিবাহপাশত আবদ্ধ হোৱাৰ কথা প্রথমবাৰৰ বাবে প্রকাশ কৰিছিল৷