নিয়মীয়া বাৰ্তা, ২৯ আগষ্ট : দুলীয়াজান আঞ্চলিক ছাত্ৰ সন্থাৰ অন্তৰ্গত নাওশলীয়া উপ-শাখা ছাত্ৰ সন্থাৰ নৱনিৰ্মিত মুখ্য কাৰ্যালয় আৰু শ্বহীদ বেদী আজি আনুষ্ঠানিকভাৱে শুভ উদ্বোধন কৰা হয়।নাওশলীয়া আৰক্ষী চকীৰ সমীপৰ নৱনিৰ্মিত শ্বহীদ বেদী উদ্বোধন কৰে সদৌ অসম ছাত্ৰ সন্থাৰ কেন্দ্ৰীয় সাংস্কৃতিক সম্পাদক অনিল গগৈয়ে আৰু কাৰ্যালয়ৰ উদ্বোধন কৰে ডিব্ৰুগড় জিলা ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাই। উদ্বোধনী অনুষ্ঠানৰ উপলক্ষে নৱনিৰ্মিত কাৰ্যালয়ৰ প্ৰাংগণত পতাকা উত্তোলনৰে অনুষ্ঠানটোৰ শুভাৰম্ভ কৰে উপ-শাখাৰ ভাৰপ্ৰাপ্ত সভাপতি ৰোহিত ইন্দোৱাৰে। শাখাৰ সম্পাদক দিগন্ত বৰাই আঁত ধৰা অনুষ্ঠানত ডিব্ৰুগড় জিলা ছাত্ৰ সন্থাৰ উপদেষ্টা লিখন বৰুৱা, তচেন ডেকা, সভাপতি বুলবুল দত্ত, দুলীয়াজান আঞ্চলিক ছাত্ৰ সন্থাৰ সভাপতি বুবুল তালুকদাৰ, সম্পাদক দীপাংকৰ গগৈসহ প্ৰাক্তন আছু তথা দুলীয়াজান প্ৰেছ ক্লাবৰ সভাপতি ব্ৰজেন গগৈসহ অন্যান্য ছাত্ৰ নেতা উপস্থিত থাকে ।