নিয়মীয়া বাৰ্তা ৬ অক্টোবৰঃ চলতে চলতে খ্যাত প্রবীণ অভিনেতা বিশাল আনন্দৰ সোমবাৰে পৰলোকপ্রাপ্তি ঘটিছে৷ দীর্ঘদিন ধৰি অসুস্থ হৈ থকা প্রবীণ অভিনেতা বিশাল আনন্দৰ যোৱানিশা বিয়োগ ঘটে৷ ১৯৭৬ চনত ‘চলতে চলতে’ ছবিৰে দেশবাসীৰ মাজত পৰিচিত হৈ পৰা বিশাল আনন্দে ১১খন বলীউডৰ ছবিত অভিনয় কৰিছিল৷
জন্মসূত্রে ভীষ্ম কোহলি হিচাপে পৰিচিত আছিল যদিও চলচ্চিত্র জগতত বিশাল আনন্দ হিচাপে প্রতিষ্ঠা লাভ কৰে৷ অভিনয়ৰ উপৰি তেওঁ কেইবাখনো ছবি নির্মাণ কৰাৰ লগতে পৰিচালনাও কৰে৷ বলীউডত সংগীত পৰিচালক বাপ্পী লাহিড়ীক প্রতিষ্ঠা কৰাত বিশাল আনন্দে গুৰুত্বপূর্ণ ভূমিকা গ্রহণ কৰিছিল৷