নিয়মীয়া বাৰ্তা, ৭ অক্টোবৰঃ কাৰ্বি আংলং জিলাৰ বোকাজানত এতিয়া মটৰচাইকেল চোৰৰ উপদ্ৰৱ। কালি পুৱতিনিশা বোকাজানৰ একেটা ঘৰৰ পৰা তিনিখনকৈ বিলাসী মটৰচাইকেল চুৰি হোৱা ঘটনাই অঞ্চলজুৰি তীব্ৰ চাঞ্চল্যৰ সৃষ্টি কৰিছে।
ঘটনাৰ বিৱৰণী অনুসৰি, বোকাজান নগৰৰ বাসিন্দা তথা ব্যৱসায়ী ৰতন দাসৰ ঘৰত যোৱানিশা চোৰৰ দলে গেটৰ তলা ভাঙি ভিতৰত প্ৰবেশ কৰি ব্যৱসায়ীগৰাকীৰ ঘৰৰ পোহনীয়া কুকুৰটোক নিচাযুক্ত দ্ৰব্য খুৱাই মুখ বান্ধি অতি কৌশলগতভাৱে তিনিখনকৈ মটৰচাইকেল লৈ উধাও হয়।
চোৰৰ দলটোৱে এএছ-০৯-এফ-৮৭৬৩ নম্বৰৰ হিৰ’ এক্সট্ৰিম স্পৰ্টছ, এএছ-০৯-জি-২৮৫৪ নম্বৰৰ এখন টি ভি এছ আপাচী আৰু এএছ-০৯-এফ-৮১৩৫ নম্বৰৰ এখন বাজাজ কে টি এম মটৰচাইকেল চুৰ কৰি নিয়ে। আজি পুৱাহে দাসৰ পৰিয়ালে মটৰচাইকেলকেইখন চুৰি হোৱাৰ বিষয়ে জানিব পাৰি আৰক্ষীক এই বিষয়ে অৱগত কৰে।
উল্লেখ্য যে চুৰিকাণ্ডত ব্যৱহৃত কিছু সামগ্ৰী চোৰে ব্যৱসায়ীগৰাকীৰ ঘৰৰ চাৰিসীমাৰ ভিতৰতে পেলাই থৈ যায়।