নিয়মীয়া বাৰ্তা, ১৮অক্টোবৰঃ পাকিস্তানৰ বেগী বলাৰ ওমৰ গুলে সকলো প্রকাৰৰ ক্রিকেটক বিদায় জনাইছে৷ পাকিস্তানৰ হৈ ২০১৬ত অন্তিমবাৰৰ বাবে এদিনীয়া আন্তঃৰাষ্ট্রীয় মেচ খেলা ৩৬ বছৰীয়া ক্রিকেটাৰগৰাকীয়ে অৱসৰৰ কথা ঘোষণা কৰে৷
সম্প্রতি চলি থকা নেচনেল টি–২০ কাপৰ সামৰণিৰ পিছতে গুলে ক্রিকেটক বিদায় জনাব৷ উল্লেখ্য যে পেছোৱাৰত জন্মগ্রহণ কৰা ক্রিকেটাৰগৰাকীয়ে ২০০৩ চনত এদিনীয়া আৰু টেষ্ট অভিষেক ঘটাইছিল৷ দক্ষিণ আফ্রিকাৰ বিৰুদ্ধে তেওঁ ২০১৩ চনত পাকিস্তানৰ হৈ অন্তিমখন টেষ্ট মেচ খেলিছিল৷ ৪৭খন টেষ্টত গুলে ১৬৩টা উইকেট দখল কৰিবলৈ সক্ষম হৈছিল৷ একেদৰে ১৩০খন এদিনীয়াত বেগী বলাৰগৰাকীয়ে ১৭৯টা উইকেট দখল কৰিছিল৷