নিয়মীয়া বাৰ্তা, ১৪ নবেম্বৰঃ ঐতিহাসিক দেৱদাসী নৃত্যৰ পটভূমিত পৰিচালক ৰাণা দত্তই নির্মাণ কৰা তথ্যচিত্র ‘দ্য ডেন্সার্ছ অৱ ডুবি’ সন্মানীয় ‘জ্যঁ লুক গডাৰ’ বঁটাৰ বাবে মনোনীত হৈছে৷ পৰিচালক দত্তই বৰপেটা জিলাৰ ডুবি গাঁৱৰ শিৱ মন্দিৰৰ পৰম্পৰাগত দেৱদাসী নৃত্যক তথ্যচিত্রখনত এক বিশেষ ৰূপত তুলি ধৰিছে৷
উল্লেখ্য যে ১৪০খন দেশৰ ৩,৫০০খন তথ্যচিত্রৰ মাজৰ পৰা ‘দ্য ডেন্সাৰ অৱ ডুবি’–এ ২০১৯–২০ বর্ষৰ ‘কাল্ট ক্রিটিক ফিল্মছ বঁটা’ লাভ কৰিছিল৷ তদুপৰি অন্যান্য কেইবাখনো চলচিত্র মহোৎসৱতো উচ্চ প্রশংসিত হোৱা ‘দ্য ডেন্সর্ছ অৱ ডুবি’ নির্মাণ কৰা হৈছে ‘ট’মাহৱক ফিল্মছ’ৰ বেনাৰত৷ বৰপেটা জিলাৰ ডুবি গাঁৱৰ শিৱ মন্দিৰত পৰম্পৰাগতভাৱে চলি অহা দেৱদাসী নৃত্যৰ আধাৰত নির্মিত এই তথ্যচিত্রখনত নৃত্যশিল্পীসকলৰ সংগ্রামী জীৱনৰ বিভিন্ন দিশ দাঙি ধৰিছে নির্মাতা ৰাণা দত্তই৷
বর্তমান কর্মসূত্রে হায়দৰাবাদত থকা ৰাণা দত্তই নির্মাণ কৰা এই তথ্যচিত্রখন উক্ত সন্মানীয় বঁটাৰ বাবে মনোনীত হোৱাটো অসমীয়া চলচ্চিত্র উদ্যোগৰ বাবে আশাৰ বতৰা ৰূপে বিবেচিত হৈছে৷