নিয়মীয়া বাৰ্তা, ১৪ নবেম্বৰঃ এবছৰ–দুবছৰ নহয়, সুদীর্ঘ ২৮ বছৰৰ পূর্বে নির্মাণ সম্পূর্ণ হোৱা এখন বিশেষ চিকিৎসালয়৷ তদানীন্তন নির্মাণ ব্যয়েই আছিল প্রায় এক কোটি টকা৷ আশ্চর্যকৰ কথা যে আজিকোপতি মুকলিয়েই নহ’ল ৩০খন বিছনাযুক্ত গ্রাম্য চিকিৎসালয়খন৷ স্বাস্থ্য বিভাগৰ এনে কাণ্ডজ্ঞানহীনতাৰ ছবিখন উন্মোচিত হৈছে কামৰূপৰ নগৰবেৰাত৷
বিগত শতিকাৰ ১৯৯২ বর্ষতেই নগৰবেৰাত স্থাপন হৈছিল ৩০খন বিছনাযুক্ত গ্রাম্য চিকিৎসালয় এখন৷ পিছে সুদীর্ঘ ২৮ বছৰৰ পিছতো এক কোটি টকা ব্যয়ৰে নির্মাণ কৰা চিকিৎসালয়খন আজিকোপতি মুকলি কৰা নহ’ল৷ চিকিৎসালয় গৃহ পৰিণত হ’ল গৰুৰ গোহালিত৷ নগৰবেৰা ব্লক প্রাথমিক স্বাস্থ্য কেন্দ্র চৌহদতে স্থাপন কৰা হৈছিল স্বাস্থ্য বিভাগৰ কোটিটকীয়া চিকিৎসালয়ৰ বৃহদাকাৰ অসম আর্হিৰ চিকিৎসালয় গৃহটো৷ স্মর্তব্য যে কামৰূপ, বৰপেটা আৰু গোৱালপাৰা– এই তিনি জিলা ক্রমে বকো, চেঙা–বাঘবৰ, দুধনৈ আৰু পূব গোৱালপাৰা৷ মুঠ পাঁচটাকৈ বিধানসভা সমষ্টিৰ কেইবা লক্ষাধিক লোকৰ চিকিৎসা আৰু স্বাস্থ্য সেৱাৰ ক্ষেত্রত নগৰবেৰা ব্লক প্রাথমিক চিকিৎসালয়খনেই নির্ভৰযোগ্য ভৰসা যদিও চিকিৎসালয়খনত নাই পর্যাপ্ত সা–সুবিধা৷
ফলত সংশ্লিষ্ট অঞ্চলৰ লাখ লাখ লোকে চিকিৎসাৰ নামত প্রতিদিনে গুৱাহাটী–গোৱালপাৰাল্ বাটকুৰি কাঢ়িছে৷ আনহাতে, বছৰৰ পাছত বছৰ অব্যৱহূত চিকিৎসালয় গৃহ ভাঙি–চিঙি চূৰমাৰ হ’ব ধৰিছে, জংগলাবৃত এক ভূত বঙলাৰ পৰিৱেশ, কুকুৰাই উম দিয়া কণী পর্যন্ত সততে পোৱা যায় চিকিৎসালয়খনৰ ভিতৰৰ ঢ়াপত৷ স্বাস্থ্য বিভাগলৈ ৰাইজৰ দাবী– শীঘ্রে ৩০খনৰ ঠাইত ১০০খন বিছনাযুক্ত চিকিৎসালয়লৈ উন্নীত কৰি মুকলি কৰিব লাগে চিকিৎসালয়খন৷ সকলোৰে মনলৈ অহা কেতবোৰ স্বাভাৱিক প্রশ্ণ– তৎপৰ হ’বনে স্বাস্থ্য বিভাগ? ৰাইজৰ দীর্ঘদিনীয়া এনে বিপর্যয়ৰ খবৰ পাই আগলৈ মেৰামতিৰ যোগেদি হ’লেও মুকলি কৰাৰ দিহা হ’বগৈনে পৰিত্যক্ত এই বিশেষ গ্রাম্য চিকিৎসালয়খন?