নিয়মীয়া বাৰ্তা, ১৮ ডিচেম্বৰঃ আগন্তুক জানুৱাৰী মাহত আন্তর্জাতিক বিশেষজ্ঞৰ দলে ক’ভিড–১৯ৰ উৎপত্তি চীনৰ ৱুহানৰ পৰা ঘটিছিল নে নাই সেই বিষয়টো তদন্ত কৰিবলৈ দেশখনত উপস্থিত হ’ব৷ বিশ্ব স্বাস্থ্য সংস্থা (হু)ৰ তৰফৰ পৰা ঘোষণা কৰা হৈছে এই কথা৷ লগে লগে বেইজিং প্রশাসনে আন্তর্জাতিক বিশেষজ্ঞৰ দলৰ আগমনলৈ প্রতীক্ষা কৰি থকা বুলি ঘোষণা কৰিছে৷ চীনে ক’ভিড–১৯ মূলতঃ ক’ৰ পৰা বিয়পি পৰিছিল সেই বিষয়টো তদন্ত হ’ব লাগে বুলি উল্লেখ কৰিছে৷ এইক্ষেত্রত আন্তর্জাতিক চিকিৎসকৰ দলক দেশখনে আদৰণি জনাব বুলিও স্পষ্ট কৰি দিছে৷ স্মর্তব্য যে চীনৰ ৱুহানৰ পৰা ক’ভিড–১৯ বিশ্বজুৰি বিয়পি পৰা বুলি বিভিন্ন দেশে অভিযোগ কৰি আছে।